【阿拉丁】Will Smith宣布會演燈神　成真人版「藍」神

可算是香港人最喜歡的黑人男影星韋史密夫（Will Smith），近年似乎少有力作，印象最深可能是在《自殺特攻隊︰超能暴隊》內飾演Deadshot。不過在不久將來，他將會有新經典作，事關日前他在facebook內宣布自己會參演真人版《阿拉丁》，明明男主角一早講明係新晉演員Mena Massoud擔正，點會又關韋叔事呢？原來佢係做燈神，即係全身藍色的Genie，都幾爆！

迪士尼的真人版系列電影，真係叫好又叫座，年頭一套《美女與野獸》更加熱爆全球，與動畫版的神同步更叫人歎為觀止。至於開拍中的就有《阿拉丁》，男主角阿拉丁一角，早就敲定有埃及人血統，加拿大演員Mena Massoud擔正，至於女主角Princess Jasmine就係在電影《Power Rangers︰戰龍覺醒》中飾演粉紅戰士的Naomi Scott，聽聽個陣容，都是好一股青春氣息。

至於燈神Genie一角，一直都冇諗過會由真人演出，話晒個樣咁得意趣緻，又全身藍色，真人點扮都唔會夠佢可愛啦，加上現行科技先進，一部電腦幾個CG要幾神有幾神，但估唔到最終迪士尼又真係搵人去演，仲要係韋史密夫。至於歹角Jafar就由新一輯《盜墓迷城》內飾演靚佬湯老死，後成為喪屍的Marwan Kenzari。日前韋史密夫高興地在facebook同大家宣布這個消息，正式進入《阿拉丁》劇組開工，又將男女主角視為家人一樣，要介紹俾大家識咁話。所有角色總算塵埃落定，而家能夠做的就係安安靜靜坐好等睇。