【午夜場】《東京攻略》最愛梁朝偉式的動作喜感

撰文:
最後更新日期:

古天樂晉身動作影星,打到飛起。其實梁朝偉都曾經好好打,唔係指《一代宗師》,而係由馬楚成執導的《東京攻略》。

全片由梁朝偉、鄭伊健、陳慧琳掛帥,冇個打得但就以動作片自居,都幾大膽。有趣係你睇完又唔會投訴喎,點解呢?

17年前的偉仔,真係仲係仔一名,好鬼有型。上年睇《擺渡人》已經老態盡現。(影片截圖)

《東京攻略》不是杜如風教你遊東京的那個節目,而係屬於2000年,由馬楚成執導的電影作品。東京是香港人最愛去的地方,能以該地方定名,實在吸引不少哈日朋友。劇情講Macy(陳慧琳飾)的日籍未婚夫在結婚當日失蹤,傷心之餘亦決定飛去東京問個究竟。出發前更遇上幫其未婚夫新屋做裝修的設計師畢大勇(鄭伊健 飾),稱為追討欠款,要一齊飛日本。去到未婚夫家時,遇上正在調查其未婚夫的私家偵探林貴仁(梁朝偉 飾)。結果就將三人連在一起,而且事件愈揭愈大,仲發現跟日本國家安全有關。

「打還打嘛!係要摷亂我個頭!」偉仔笑上。

呢種表情,好鍾意睇。

作為動作片,入場睇梁朝偉打好似講唔通咁,但其實導演都明,所以全片的拍攝都以花巧見稱,跳個圈轉個身都慢動作,件褸仲要慢慢飄飄下,好鬼有型。至於拳腳功夫,沿用成龍的動作哲學,現場有咩就用咩打,有遮、有梯、有梳化,仲有電動滑板,以及駕快艇駛入東京灣,打唔打得唔緊要,最緊要睇得。更重要係,有梁朝偉式的喜感注入,偉仔的搞笑方式同佢份人一樣咁內歛,但就鍾意佢冷冷地又笑一笑的感覺。正如片中一幕打完一輪,就去埋怨大家整亂佢個頭,仲拎把大梳梳番四正,第二個做就噓,偉仔做呢,好笑到暈啦!



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。