【任噏影評】《皇家特工金圈子》主角有女友 狗仔JB慘豬遭冷落?

撰文:胡劍威
出版:更新:

本季電影檔期大作《皇家特工:金圈子》上映多天,坊間影評好壞參半,好多人話整體不及上集《皇家特工:間碟密令》,尤其關於狗仔的戲份。但其實睇真啲,今集依然有狗狗由頭帶到尾,只是大家把「兩大奸角」機械狗忽略了……

在《皇家特工》中狗仔同鞋,係成為Kingsman最重要的東西。(網上圖片)
JB同Eggsy於上一集《皇家特工:間碟密令》出雙入對。(網上圖片)

注:以下含劇透,慎入!

《皇家特工》(Kingsman)在2014年上畫時大收旺場,其中主角益仔Eggsy(Taron Egerton飾)同狗仔JB的一段兄弟情,感人得來又印象深刻,單是名字「JB」已包含了反恐電視劇《24》男主角JACK BAUER、《007》的JAMES BOND、《叛諜追擊》的JASON BOURNE(麥迪文飾)等元素,可說是整套戲的主軸。不過,來到第二集《金圈子》(The Golden Circle)),JB變成了閒角,好似可有可無,只是間中出一出場露露面。事關Eggsy已經有了情人Tilde公主(Hanna Alstrom飾),第二集用了很長篇幅交代一對小情侶的日常,雖然公主成日抱住JB,但Eggsy幾乎沒有在戲中同JB互動,完全失去了第一集的兄弟感,好多觀眾睇完都大罵Eggsy有異性冇人性,話佢完全唔理JB。

其實,大家似乎忘記了,在第一集已交代過JB唔適合出任務,所以佢跟住公主留在家中做一隻悠閒的寵物,是合情合理。而Eggsy第二個被觀眾大罵的原因,指他在JB死後都沒有太大反應,明明第一集講到JB好重要,唔捨得開槍殺佢,但呢次JB真係死時,Eggsy又好似唔理兄弟死活……這一點,大家又似乎忘記了,同JB一齊死的,仲有Eggsy個好朋友,一人一狗同時失去,Eggsy有乜理由唔傷心?只不過,梅林勸佢要記住特工訓練,就是要控制情緒,所以Eggsy先化悲憤為力量去報仇。可能因為電影中這一段去得太快,只是幾句對白就完了,才令觀眾有錯覺以為Eggsy唔傷心,到最後公主送上另一隻新狗仔,話「佢雖然唔能夠代替JB…」先令Eggsy釋懷。

點圖放大:

+4
今集《皇家特工:金圈子》沒有太多真狗,但就換上了兩隻好型的機械狗。(網上圖片)

真正奸角係佢…

至於第二集的狗狗元素,其實一樣多,更可算是貫穿成套戲,但點解又好似唔多覺?相信是因為出場的狗不是真狗,令大家又有另一個錯覺。今集的重點奸角其實不是影后Julianne Moore,也不是獨臂爛仔Charlie,而是兩隻CG機械狗,它們的鏡頭分分鐘比戲中好多演員更多,看似凶惡但其實又冇乜用,有時又會認錯人搞搞笑,而且在戲中可以看出,Julianne Moore演的毒品女王好愛錫這兩名忠心部下,只可惜因為做奸角,最後都打唔贏Colin Firth飾演的翻生Harry,兩隻機械狗演活了「獵犬終須山上喪」,其實幾淒美。

 

在第二集中失憶的Harry全靠狗仔才能變回一名特工。(網上圖片)

毒男與狗

不過,要數最感人的一段,肯定是Harry回復記憶那段「男人老狗」,作為一名優秀特工,Harry一生沒有社交、沒有朋友,用現在的說法其實就是一名毒男,而佢在遇上Eggsy之前,惟一拍檔只有狗仔PICKLE,導演Matthew Vaughn在今集就巧妙運用這一點,因為Harry沒有正常的生活,要刺激佢回復記憶,只有出「狗招」。透過逼佢記起PICKLE點死,令Harry變回當日神勇的特工加拉赫德,這一段戲可說是全套140分鐘之中最動人、最震撼,而同時又可以將舊時代「毒男特工」的悲哀,同現代特工Eggsy豐富的感情生活做出完美對比。睇完這一幕,你還能說今集《皇家特工》「冇狗好睇」嗎?

 

Harry從來冇殺死狗仔PICKLE,咁佢係點死?睇返第一集啦!(網上圖片)