【午夜場】《藍江傳之反飛組風雲》張國榮二度演阿飛 龍五做探長
撰文：許育民
出版：更新：
一套《賭神》，周潤發的高進角色深入民心，而飾演其打手龍五的向華強都一樣因此而爆紅。事實上他是當年電影公司永盛的老闆之一，亦由於對自己演技滿有信心，向生一於嘗試做主角的滋味，食住當年大熱的傳記風，飾演四大探長之一的藍江。
自《阿飛正傳》後，張國榮再度演阿飛，十分有型。
做主角當然要有一定的自信，但自信唔可以當飯食，贏到自信輸了票房就盞搞，所以向生都冇同錢鬥氣，找來當時得令的張國榮及玉女獎門人周慧敏做男女主角，吸納番一定客源。
故事講藍江在追查一宗公寓命案時，得罪了大毒梟跛豪，於是冇得再查大案，被調職到「反飛組」，專門對付飛仔飛女，從而認識了阿飛白榮飛（張國榮 飾）及其女友梁小敏（周慧敏 飾）。雖然調職，但藍江一心要追查命案和販毒事件的真兇，鍥而不捨，最後被他查出真相更獲得港督賞識，榮升為九龍總華探長。
留意下向華強後面，有導演陳果客串臨記。
電影在1992年上畫，票房約1,200萬，只算不過不失，未能大收跟向華強的吸引力有冇關係就唔敢下判斷，因為電影根本以張國榮做膽，跟有錢仔吳國敬對決為副線，至於向華強就只是穿插其中，查下案。不過當年該片上畫不久，就被指是渾水摸魚，事關全片與「傳記」二字不符，根本冇乜點講藍江的發跡，令一心追從傳記片的觀眾失望。