【追龍】吳毅將狂獸形象冇嚇親太太 唐麗球︰我知佢只係好演技!

撰文:許育民
出版:更新:

訪問吳毅將當日,正值《追龍》首映,難得參與香港電影,首映禮當然要盛裝出席,還攜眷與太太唐麗球同行。
唐麗球都是圈中人,84年香港小姐季軍,2003年嫁給吳毅將後淡出幕前。觀眾如我都會單憑吳毅將野獸式的演技,一口咬定這是個《美女與野獸》組合,於是見到吳太,腦海第一條問題就是︰「點解當日會肯接受佢?」
「因為我心地好囉。」唐麗球說罷笑了良久。
攝影︰江智騫

唐麗球近年都甚少出現公開場合,但老公有新戲首映,當然要鼎力支持。(江智騫 攝)
二人在場表現恩愛,不時都拖住周圍走。(江智騫 攝)

當年接受追求︰「因為我心地好囉!」

二人表現相當恩愛,除了首映上形影不離,訪問時要求一杯凍檸茶兩份飲。吳毅將︰「一杯得喇,濕下個口。」「唔好亂講嘢。」唐麗球說。起初不明所以,直至知道將哥之前大病要入院,就聯想到兩者關係。

吳毅將全程都好照顧太太,首映場內四出應酬之後,都會自動歸位返到太太身邊,怕她一個人悶。作為觀眾的我,從未想過吳毅將會細心如此,直覺上他是粗聲粗氣,粗枝大葉的一群。唐麗球︰「你睇人唔準呀!佢平時好溫柔。」

內在美都要認識了才發掘到,重點是起初的一句接受。「我追佢時都未拍呢類戲嘛!」「咩呀!拍咗喇,仲要係拍完《弱殺》冇耐,最勁嗰部。」唐麗球搶白。《弱殺》中的吳毅將飾演個有童年陰影的強姦犯,會對智障的鍾淑慧下手,戲中有露股、強暴等狂獸行為,這類一個演員走近你,背部有滲出寒意嗎?「因為我心地好囉,哈哈……我都係演員,好明白都係戲一場,真人唔會咁樣,的確在接觸後,覺得佢好斯文、好溫柔,所以更覺得他演技好得。」

追求唐麗球時,吳毅將剛拍完《弱殺》,不得不讚她公私分明的態度。(影片截圖)
吳毅將四圍招呼老友,唐麗球就站在一邊靜心等候。(江智騫 攝)

吳毅將愛乾淨到潔癖程度

除了溫柔,吳毅將另一鮮為人知的是他為人愛整齊整潔︰「我成日教個女,用完每一樣嘢,擺番好,下次用就方便嘛。」由於對整淨程度的不一,結婚初期都曾經為一些小事有爭拗。唐麗球︰「後生時會因為執屋而嗌交,我明明已經執好屋,但佢覺得我未夠好,老實,佢掃地又真係乾淨過我。」吳毅將憶述以前的確會為這些小事勞氣,但自信佛和上年大病一場後,都看通了。「有時見到老婆用完支棉花棒,就咁擺喺度,舊時我會嘈︰『有冇搞錯呀?隨手丟落去垃圾筒都唔得?』而家我會『唉……我丟囉!』」

夫妻二人非常恩愛,不時在網上曬合照。(網上圖片)
兩公婆更有趣的地方是吳毅將信佛,唐麗球信天主教,但從未為此嘈過。「我信萬法歸一」吳毅將說。(網上圖片)

為件叉燒同人嗌交

吳毅將的逆來順受,屬家人限定,對外,他還是戲中的吳毅將。結婚多年,唐麗球都多次感受過他的火氣有多猛,其中一次更如電影情節般劇劇性。話說廿幾年前,還可以酒後駕駛,一次吳毅將要駕駛返家,為免生意外,專程行慢一點,但就被尾隨的私家車不停啄住,又閃車頭燈,結果戲劇性一刻爆發!唐麗球︰「佢突然在機場隧道正中停低架車,熄埋冷氣,然後落車走去叫後面個司機講︰『落車!』當時我好驚,但結果個司機見到係佢,已經立即不停講對唔住,誤會!誤會!但我當時真係好驚會打起上來。」雖然是陳年舊事,但今天講起吳生依然有火︰「我已經行慢線啦,你仲要逼我!」OK!OK!冇事喇。

又試過一次,吳毅將為了件叉燒與燒臘舖老闆發生口角。吳毅將︰「當時我想揀件叉燒,但啲箝用晒,心急起來就徒手拎,結果老闆嘈我︰『喂!用箝吖,衛生啲好冇呀!』結果我忍唔住又同佢鬧鬧鬧。」當下是爭持不下的,但事後吳毅將想起成件事都係自己錯,成晚籮籮攣唔舒服,第二日就專程去同老闆道歉認錯。「又好笑喎,個老闆第二日冇晒事,笑笑口講︰『無嘢呀!你做戲我成日睇呀!』人就是這樣,你敬我一尺,我敬你一丈。」成件事雖然充滿火氣,但都睇得出吳毅將只是一時衝動,說到底都是個講道理的人,正如讚自己︰「勇於認錯是好的。」

身為1984年港姐季軍,問唐麗球可有想過復出?「唔啦,我冇人咁叻識凍齡,而家朝早起身,要到傍晚先消到水腫,點拍呀!」其實波波都有幾分幽默感。(江智騫 攝)
+3
你可能感興趣