【午夜場】《復仇者聯盟2》重型Hulkbuster慘勝變形俠醫最經典
撰文：許育民
出版：更新：
以隊友計，變形俠醫Hulk絕對係《復仇者聯盟》中，一個最麻煩隊友。佢雖然好打，但根本控制唔到自己，一發狂就目中無人，往往會傷及隊友。
在《復仇者聯盟2︰奧創紀元》入面，Tony Stark就特意將Iron Man重型化，製成Hulkbuster去對付呢位隊友，但失禮講句，再重型的裝備都真係打唔過Hulk的瘋狂。
Hulkbutster安裝上連橫拳裝置，直頭係部打樁機咁。（影片截圖）
即將上畫的《雷神奇俠3︰諸神黃昏》，一頭清爽短髮造型的雷神，而且又滿又幽默感，當然惹來大家喜愛，但其實觀眾更期待是變形俠醫的登場，單單在預告片中與雷神在鬥獸場決戰，已經覺得好正。這位復仇者聯盟的隊友，據粉絲分析，雖然佢得鋪蠻力，但計戰鬥力應該係眾人之中最強，有佢加盟係如虎添翼，是但係首要係控制到佢先。
身形係佔優，不過Hulkbuster都不時處於捱打狀態。（影片截圖）
在《復仇者聯盟2》中，壓軸的群魔大戰固然好睇，因為好睇在夠齊腳。但其實要數印象深刻，中段Iron Man對決Hulk一幕先至係睇到人血脈沸騰。Tony Stark自知就咁出隻Iron Man好難有得贏，於是來個重型改裝，仲為佢改一個極針對性的型號︰「Hulkbuster」雖然有佢，身位上係追番少少優勢，加上一個「葉問式」連環拳設計，似有勝算，可惜落到場都係點都係要輸一截。Tony又知道同Hulk對決損耗必巨，所以在空中又設有補給站，不時送上全新裝備補元，確實嚴陣以待。到最後，在一輪激戰後，係成功收服到Hulk，不過只能用一句「慘勝」來形容。