【聖誕電影】《星戰》註定冧莊?《逃出魔幻紀》《大娛樂家》挑機

撰文:許育民
出版:更新:

曾幾何時,聖誕檔期是電影公司兵家必爭之地,這現象在世界各地都發生緊,香港都係,不過近年莫講話港產片,就連合拍片都避開這個檔期,事關每年的對手實在太強。
上年都仲有套《擺渡人》同《長城》,今年似乎更放軟手腳,集中火力去慶歲檔。觀乎對手,《星球大戰:最後絕地武士》、《逃出魔幻紀:叢林挑機》、《大娛樂家》、《電流戰爭》同《柏靈頓 2》,都已經好齊腳,不過仍有位港星做死侍,冒死挑戰呢個檔期,大家又估唔估佢係邊個?

上集已暗示主角Rey是擁有原力的,今集仲唔到佢大展所長。(影片截圖)

《星球大戰:最後絕地武士》
Star Wars: The Last Jedi

聖誕睇《星戰》,似乎係近年的指定動作,剔除上年的外傳,今集會緊接《星球大戰︰原力覺醒》的故事發展,主角Rey將繼續與Finn, Poe及Luke Skywalker展開非凡旅程。同以往一樣,未有確實故事大綱,網民都是靠估,從預告可見,Rey接受「銀河傳奇」Luke Skywalker的指導,好肯定今集會真真正正地成長為一名絕地武士,所以不少星戰迷都期待Rey點樣用激光劍斬上陣。殺敵之餘亦不忘賣萌,除了BB8,今集仲加埋貌似企鵝的Porg,贏面好大。所以縱使有外敵挑戰,但從戲名已經參透到玄機︰「最後絕對無事!」

有睇舊版的朋友,都想睇睇事隔22年,又可以有咩新玩法。

《逃出魔幻紀:叢林挑機》
Jumanji: Welcome to the Jungle
22年前的《逃出魔幻紀》真係一代人的回憶,一副棋困住羅賓威廉斯幾廿年,由細路困到變中年大叔,好慘情,但故事情節非常豐富,以當年的視覺特技來說,簡直歎為觀止。羅賓威廉斯已成故人,新版找來狄維莊遜 (Dwayne Johnson),今次不用開快車,但一樣刺激好睇,屬大熱經典回歸!而且時代變,今次就由一副棋進化成舊式電子遊戲機,對後生仔來說,易明好多。

如果你鍾意睇曉治積曼在《孤星淚》的演出,呢套《大娛樂家》應該會對味的。

《大娛樂家》
The Greatest Showman

金球影帝曉治積曼唔做狼人先好睇,他早在《孤星淚》的演出已經不錯,今次繼續歌舞昇平做《大娛樂家》,真人真事演活「魔幻表演劇團」之父巴納姆的發跡傳奇。說是傳記電影,其實又好勵志,話說他本來甘於平淡,但公司裁員令他束手無策。但中國人話齋,窮則變,變則通,一變就令他踏出人生最具勇氣的一步,籌劃前冇古人做過的馬戲團,集世界各地天生異稟的團員,為大家提供不同的精彩演出。電影仲有金球影后米雪威廉絲,《歌舞青春》型男碩克艾佛朗及《蜘蛛俠:強勢回歸》辛蒂亞載歌載舞,最重要一點,戲中歌曲是由《星聲夢裡人》金像音樂團隊度身訂造,讓大家呢個聖誕繼續La La Land。

男神扮演Edison,是發明電燈的那個Edison。

《電流戰爭》
The Current War

有啲要睇下劇情先知有冇興趣,但有啲戲睇見個人就已經想睇,男神班尼狄甘巴貝治就係後者。今次呢套《電流戰爭》,扮飾大家熟悉的「電燈之父」愛迪生。故事發生在1880年,他與鐵路大亨威斯汀豪斯(米高沙朗飾)為了染指全美國以至全世界的電力供應系統,展開連場惡鬥。愛迪生發明了直流電發電機,威斯汀豪斯卻研發了交流電發電機,當兩大發明家明爭暗鬥之時,神秘後起之秀特斯拉(尼古拉斯候特 飾)突然出現,令整個局面改變。其實我只關心電費點樣可以平啲。

一本立體書,搞到呢隻懶熊捱生捱死。

《柏靈頓 2》
Paddington 2

聖誕即使冇動畫睇,點都要有些溫情可愛故事睇下,《柏靈頓2》開正呢個層面。今集講柏靈頓最錫的露絲阿姨百歲大壽,於是決定要為她準備一份特別的賀禮。千挑萬選之下,他在古董店看中了一本立體書,可惜太貴,於是要四出打工,努力儲錢,點知錢未儲夠,立體書就被偷走,但露絲阿姨大壽將至,柏靈頓點樣先搵得番本書呢?呢個故事教曉大家,儲錢?碌卡嘛!

係佢喇!今年唯一一位港星演出的聖誕電影就係《妖妖鈴》的吳君如。
除了有殭屍,電影還注入不少昔日港產片元素,算係同大家回憶一下。(影片截圖)

唯一香港人主演︰吳君如《妖妖鈴》
雖然係香港人主演,不過呢部並非港產片,或者可直接話係國產片。故事背景是講一幢即將拆卸的舊樓,由於地產商要逼走住戶重建,不但截水截電,而且派人扮鬼嚇走住戶,而君如就以道姑造型驅鬼。大家都知內地唔可以有鬼鬼怪怪電影,但講明係扮又唔同講法,正宗灰色地帶。電影除了有君如,其實仲有吳鎮宇主演,兩位是自2000年《茱麗葉與梁山伯》後,再度合作。至於點解叫《妖妖鈴》,因為其國語發音正好是內地報案熱線110。

你可能感興趣