【午夜場】《低俗喜劇》有乜專業過用一部戲要你記住「俹簁」點寫

撰文:許育民
出版:更新:

想當年,因為關淑怡首《繾綣星光下》,教香港人學識了「繾綣」呢兩個字。其實除了聽歌學中文,睇戲都一樣長知識。一套《低俗喜劇》,首先教曉大家食牛歡喜,又要跟鹹酸菜一齊煮。不過講到中文教學,就有兩粒字大家經常講,但永世都唔識寫,直至睇完呢套戲,記得「俹簁」嗎?

《低俗喜劇》食牛歡喜一幕,又係經典到不得了。

故事講電影監製杜惠彰(杜汶澤飾)應邀出席學校講座,跟大學生分享其監製生涯,結果整個過程被學生拍低,再放上網,原來就係為挽救由佢監製,誠邀到邵音音復出主演的三級片《官人我又要》。《低俗喜劇》可謂開創了香港電影新類型,過去只有賣血腥、暴力、色情先會被定為三級,但這部純粹因為入場要聽佢講粗口的三級片,都算是一個新指標。

睇戲學生字,呢幕好有教育意義。

戲中很多幕都夠大家爆笑,只可惜唔係幕幕都出到街,但能夠公開分享的可能只有「俹簁」(音:乸西)這一幕。由於杜汶澤的助手薛凱琪是竹昇妹一名,聽見一句「俹簁」,以為要佢做出不雅動作,引發要去平機會告佢,繼而要阿澤向楊千嬅飾演的官員不停解釋,並要認認真真去查字典,為該詞語得出一個正確解說︰「俹簁者,作事苟且而不精細也。」真係學到好多嘢。