【鬼網】港式鬼片夠貼地 劏房紋身玩Live新元素新嚇法

撰文:許育民
出版:更新:

近年致力拍攝本土題材電影的mm2,繼年中玩殭屍的《救殭清道夫》,要你驚中帶點喜後,今次唔轉彎抹角,直入主題拍鬼片!
11月23日上映的《鬼網》,延續港產鬼片模式,以3個短故事分拆,分別由三位導演執導,題材方面亦非常貼身,包括講入住工廈劏房撞鬼的《好鄰居》、以為紋身可催情轉運的《二重身》,還有為爆Hit Rate,玩探靈直播玩到過晒火位的《冤有頭》,其中《冤》入面,Jumbo曾淑雅便瞓身演出,挑戰自己膽量,俾一堆麥皮蟲照頭淋。

其實都係撞鬼故事,但加入工廈劏房元素,立即起共鳴,入場都肉緊啲。(劇照)

現實市況,凡入不到內地市場的電影題材,本地製作人近年都會避重就輕,或要扭扭個故事橋段先有機會突圍,不過創作受限制之餘,是否一定可過檢也成問題,故不少公司寧願放棄該類題材,導致曾經是港產片一大支柱的恐怖片也銳減。亦有投資者睇中這個細餅仔,開拍一些為本土或東南亞市場製作的驚慄片,以吸納這批差點被遺忘的客源,而《鬼網》就屬於這一類。

張建聲飾演紋身師,但心懷不軌。(劇照)
鬼上身到成支鉛筆直插入手,呢幕唔驚,但好痛。(劇照)

劏房、紋身、探靈直播

電影分成三個故事,《好鄰居》講郭奕芯剛搬入工廈劏房,積極認識新鄰居下,卻介入了被虐少女Emma(鮑康兒 飾)與她男友的關係中,從此靈異事件接連發生,更發現她背後可怕的故事。

《二重身》講述少女綺雯(許雅婷 飾) 對愛情執著,決定刺上催情改運符咒刺青,希望可以令男友家洛(麥子樂 飾)回心轉意,卻在不知不覺間誤墮紋身師阿森(張建聲 飾)的陰謀之中,靈魂日漸被吞噬。

 誰也想當網絡紅人,《冤有頭》故事就講大學生忠仔(陳家樂 飾)帶著妹妹小茹(簡淑兒 飾)以及朋友珈珈(曾淑雅 飾)、肥星(徐浩昌 飾)用 Live App到鬼屋直播探靈,又竟然意外發現一對腐屍,決定乘機大造文章谷Hit Rate,但隨後便惹來一個個索命預約。

+8
Jumbo表示:「我諗女仔無話唔驚蟲,仲要咁多照頭淋,但為咗拍攝效果唯有頂硬上豁出去啦!」(劇照)
除了用蟲沖涼,仲會請你食蟲蟲三文治,可唔可以要求烘底?(劇照)

土炮製作求真實 蟲蟲淋浴親身上陣

講起港式恐怖片,其中一樣特色就係要土炮製作夠Low Tech,因為太多CG會壞氣氛。以《冤有頭》為例,曾淑雅(Jumbo)飾演其中一位探靈隊成員,結果得罪鬼魂惹來殺身之禍,不時有幻覺產生,其中一場花灑淋浴戲,就因幻覺作祟,所有水花竟變成麥皮蟲,但劇情又要講到Jumbo起初若無其事咁繼續沖涼,絕對係同蟲蟲作肌膚之親,同蟲蟲玩遊戲。

Jumbo講明自己都驚昆蟲類物體,但為求效果都要頂硬上。「拍呢場戲之前,我已經完全無擔心出浴戲會唔會走光,只係諗點樣同啲蟲蟲死過,最後我決定用愛去融化牠們。」講到咁神?即係用咩方法?「在拍之前,我專登叫工作人員攞啲蟲出來同我培養感情、好似傾吓計、摸吓,結果都真係可以克服到呢份恐懼,拍攝時起碼冇大叫,而且一Take過唔使NG。」聽落都真係幾叻女,不過Jumbo話拍完,都硬係凝住有蟲在身。「雖然已經有哂心理準備會俾啲蟲照頭淋,但Roll機時依然會毛管戙,而且啲蟲會喺塊臉同身爬來爬去,好核突,拍完返屋企都成日覺得有蟲喺身。」咁大膽,呢下要讚。

你可能感興趣