【周末午夜場】《最佳損友》80年代賤男示範 三大金句今日仲啱使

撰文:
最後更新日期:

今晚(20/1)深夜翡翠台會播出王晶執導,劉德華、邱淑貞、陳百祥、馮粹帆、曹查理主演的《最佳損友》(1988年3月27日上映)。呢部係30年前的經典,係晶哥喺《精裝追女仔》系列以外,另闢一笑片經典。又因為兩個系列嘅演員都差不多,好易令人混淆。

電影主線講翁世傑飾演的徐定富,為阻止細佬徐定貴(劉德華 飾)接手家族生意,決定叫公司三大損友教唆佢,令佢集爛口、爛滾、牛精於一身。

無論係《最佳損友》定《精裝追女仔》系列,都會有印巴籍角色客串搞下笑。(影片截圖)

經典無厘頭嘅愛滋病快速測試,請盡量伸出條脷點自己隻左眼。(影片截圖)

三大損友分別係牛精帆(馮淬帆 飾)、鹹濕超(陳百祥 飾)及臭口奇(曹查理 飾),得到「免炒金牌」同「任使金卡」嘅眷顧下,喺公司任意妄為,主力就係要教壞個細佬。一盤生意打理得好唔好,同係唔係爛口、爛滾、牛精,其實冇咩直接關係,所以都係搵戲嚟做,而在主線教壞徐家貴之餘,追女線都係另一主打。

男士吹水飯局

《最佳損友》中有好多精彩爆笑場面,不過數到最抵死,除咗陳百祥為保老友安全而被君如蹂躪一幕,四個男人喺炸雞店對「愛情」嘅睇法都精闢獨到。好似曹查理話︰「好就女人,唔好就累人,所以一得到手就要撇。」呢種押韻句式,到今時今日葉念琛的作品都時有出現,即係「鍾意就keep,唔鍾意就delete」嘅始祖。

而陳百祥一句︰「冇理由為一棵樹放棄成個森林」唔好話老套,呢句金句早已成為唔少人嘅座右銘,係自己感覺良好唔結婚嘅最佳理由。至於馮粹帆,要配合牛精形象,就講出︰「總之女人,60歲前唔好同佢講真話,70歲前唔好俾飽飯佢食。」句句都咁歷久常新,久不久聽番都仲係咁警世。

一幕30秒左右嘅男士吹水對話,足足影響幾代人。(影片截圖)

再賤嘴都未必敢拍

其實時下嘴賤者大有人在,「mean精」更是隨處可見,不過時代進步,在關注種種歧視底下,好難再將相關內容放入電影當中拎出嚟取笑。好似戲中有幕四位男士爭相高價租床位偷窺豆豆(邱淑貞 飾)沖涼,唯獨有個唔使錢仲俾番二百蚊津貼嘅,原來係要你犧牲色相俾嗱喳星摸。又一幕講幾個整蠱陳百祥,話佢對愛滋病呈陽性反應,要佢做各種無厘頭嘅快速測試,又係勁好笑,不過放喺今日可能又已經引起相關人士不滿,要平機會見。

點圖放大更多劇照:



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。