【多圖】湯告魯斯傷後復工拍《職業特工隊6》 跳樓追飛機搵命博

撰文:陳穎思
出版:更新:
湯告魯斯傷後復工即拍跳樓戲,粉絲驚呼:睇住呀!(視覺中國)

湯告魯斯(Tom Cruise)去年8月為新片《職業特工隊6》(Mission: Impossible 6)開工,穿上威也拍攝一場跳樓戲時,因起跳距離錯誤,未能準確跌進預計落地位置,下半身硬撼大廈外牆,導致腳踝受傷,拍攝進度亦告受阻。幸好經過多月養傷後,湯佬終於傷癒復出,一向出名搵命博的他,又再親身上陣拍攝高危動作場面,只見他飛簷走壁極唔錫身,只能提醒他一句「睇住呀」。

畫面好靚,不過都係要睇住呀!(視覺中國)
招牌動作出晒手刀咁跑好落力,不愧為湯告魯斯。(視覺中國)
呢個畫面似曾相識,事關湯佬幾乎集集都追飛機,而佢又次次都跑得怏過飛機喎……(視覺中國)

昨日湯佬於倫敦「黑衣修士站」大樓開工,拍攝一場屋頂追飛機場面,同類場面經常於《職業特工隊》系列內出現,觀眾應不會感陌生,而今集亦不例外,湯佬親自上陣,跳樓喪跑樣樣齊,吸引大批途人在車站附近圍觀。雖然拍攝進度延遲半年,但電影公司表示將如期於今年7月尾上映。

工作人員確保湯佬安全。(視覺中國)
大批途人圍觀睇拍戲。(視覺中國)