【閨蜜2】陳意涵結婚了 好姊妹薛凱琪張鈞甯喪玩到越南
撰文：許育民
出版：更新：
4年前，陳意涵、薛凱琪、楊子姍主演的《閨蜜》上映，用好姊妹感情撐住成部戲，女觀眾看得感動有共鳴。
4年後，調子一轉，人物一變，拍成續集《閨蜜2之單挑越南黑幫》。楊子姍換上張鈞甯，陳意涵結婚了，兩位姊妹一於狂歡今晚夜，玩到癲喪，玩到唔知去到邊，變成瘋狂搞笑戲。
好姊妹結婚，身為好姊妹梗係要做番姊妹。（劇照）
婚禮在越南舉行，由陳意涵、薛凱琪與張鈞甯組成「醉爆閨蜜團」，去到越南後就獲邀到古堡出席派對，期間更參與啤酒競飲大賽。不過呢個唔係一般的啤酒比賽，除了大大杯，仲特別「重口味」，皆因啤酒中加了料、有蛇有蝎子，不過蛇同蝎子呢杯烈酒，又點會難到三位烈女呢？加上在古堡堡主催促下，三人都舉杯而盡，亦代表醉爆之旅正式展開！
烈酒點會嚇到烈女，最多咪醉爆。（劇照）
狂飲之下，陳意涵、薛凱琪與張鈞甯已經不醒人事，而一醒之下，就係被大批古惑仔包圍。眼前敵方人多勢眾，三人身邊最強的迎戰武器就係沙灘飛碟。面對越南黑幫窮追不捨，三位最終可唔可以逢凶化吉呢？呢個越南之旅，註定會發生一連串意想不到的驚險事件。