【金像獎2018 .茶水蓮姐】唔信自己得獎︰其實我沖咖啡唔好飲!

撰文:
最後更新日期:

第37屆香港電影金像獎今晚舉行,早前大會率先頒發專業精神獎予入行30年的茶水蓮姐楊容蓮(Pauline)。

對於蓮姐,大家未必認識,但對於她的工作就大感興趣,到底要點先可以做到呢個崗位,係咪要有一對巧手,沖出如金茶王般的奶茶先做得呢?「其實我沖咖啡唔好飲!佢哋話好飲都係氹我啫!」蓮姐笑說。

蓮姐以極罕的盛裝出席頒獎禮。(電視截圖)

蓮姐今日盛裝出席,並分享自己的得獎心得︰「拎這個獎很開心,多謝大會,多謝家人,孫仔孫女今晚都有來,亦要多謝入場看香港電影的觀眾。多謝演員及助手對她的包容,亦要萍姐(唐萍),是她帶我入行。出來工作是要交個心出來的,你對人好人家自然對你好。」

蓮姐在台上多謝帶她入行的萍姐。(電視截圖)

在早前的通知獲獎影片所見,蓮姐深深地緊抱阿Sa。「其實當時我好想喊!」蓮姐說。(影片截圖)

蓮姐是行內紅人,不少天王巨星都相當愛錫她。(網上圖片)

蓮姐平時管茶水之餘,還協助場劇分派飯盒。(影片截圖)

蓮姐︰「知自己得獎時,我想喊出嚟」

早在宣布得獎的影片中,觀眾已覺得蓮姐似乎對於得獎全不知情。隨後《香港01》已致電蓮姐訪問,原來佢真係不知道,甚至當阿Sa確定她拎獎時,都以為是大整蠱。蓮姐︰「我一直唔知,阿Sa同我講時都仲半信半疑,直至昨日睇到條片先敢相信。」

片中所見,蓮姐表現得非常淡定,查實當下是心亂如麻︰「阿Sa同我講我得獎時,我已經想喊,但我反應唔嚟。阿Sa後尾都問我做咩唔笑,我話唔係唔想笑,係到今日睇到條片先識笑。」回想30年前入行,蓮姐本住想搵一份唔使坐定定,可以周圍去的工。「做工廠被困死,好悶,呢份工可以見到唔同人好開心,不時都有唔同嘅工作環境,而且一套戲做完,開另一部戲就見到另一班人。」除了工作性質合乎蓮姐要求,人工吸引都係賣點。「一個唔識字嘅女人,能夠靠佢養活自己,已經好開心,而且收入仲幾好。」

【金像獎2018.茶水蓮姐二】客串《算死草》︰一見鏡頭就腳震

大會當日就去到蓮姐開工現場,將得獎消息告知。(影片截圖)

「話好飲都係氹我啫!」

能夠做足茶水30年,可想而知蓮姐沖茶技倆應該有番咁上下,咁到底蓮姐係沖奶茶醒,定係沖咖啡勁?當中有冇咩秘訣?「我自己飲過呀,其實我沖咖啡同奶茶都唔好飲,哈哈……佢哋話好飲都係氹我啫!」蓮姐更大讚自己個崗位係整個電影行業中最好做一個,「大家嚟到冇選擇,我沖乜就飲乜,一係出去自己買,所以冇乜壓力。」聽落霸氣十足,但相信都係講下笑搞下氣氛。
 

台前幕後,蓮姐都照顧有嘉,各人的口味都會略知一二。(影片截圖)

【金像獎】張繼聰蔡卓妍任金像司儀 阿聰15年來首伙拍阿Sa感興奮

當工作人員係仔仔女女

既然講到呢行咁好做,係咪有少少心動想跟蓮姐入行搵食,有冇計呢?「想入行就要搵人肯帶住你,起初跟住我一齊做,收入分帳,到有人識你就可以自己接工作喇。」係咪心動呢?不過蓮姐都感慨今非昔比,事關香港電影開戲量大減之餘,不少更已北上發展,咖啡茶都變成烏龍茶。「而家全行得幾個茶水都唔夠做,所以都好少帶人入行。」咁到底點先算係一個稱職的茶水阿姐呢?「如果你做到當工作人員係仔仔女女咁照顧,你就會稱心如意。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。