【周末午夜場】《嫁個有錢人》Sammi賀歲單挑《嚦咕嚦咕》小勝!

撰文:
最後更新日期:

仲有唔夠半個月就過年,所以今個星期開始深宵就播出昔日的賀歲片來贈慶。今晚(3/2)深夜1:40,翡翠台會播出由谷德昭執導,鄭秀文、任賢齊主演的《嫁個有錢人》(2002年),呢個戲名,來到今日都仲係咁想成真。

呢個配搭源自《夏日的麼麼茶》,一樣大收。(劇照)

《嫁個有錢人》於2002年的賀歲檔上映,當時的鄭秀文(Sammi)已經係天后級,經2000年的《孤男寡女》大收旺場後,開始進軍賀歲檔。即使1998年已經有套《行運一條龍》,但重點都係落在周星馳身上,能夠獨力擔正做賣點賀歲的,係由2001年的《鍾無艷》開始。

電影去到米蘭取景,營造童話式浪漫。(劇照)

由於《鍾無艷》大收$2,700萬,Sammi便展開其賀歲女王之路。《嫁個有錢人》中,Sammi飾演的阿咪,係一間石油氣店舖的「太子女」,不過就係一腳踢,落手落腳那種太子女。為脫離勞動生涯,立下宏願要「嫁個有錢人」。於是開始扮富貴,出入高級場所,結果就被佢遇到任賢齊,可惜原來佢都係充富貴的窮鬼一名。同年賀歲檔最大競敵係《嚦咕嚦咕新年財》,對家有劉德華、古天樂、劉青雲加多個梁詠琪,陣容強勁,但都以200萬之差,輸俾票房大收$2,100萬的Sammi,可見咩叫當時得令。

Sammi一身公主裝,是少女們夢寐以求。(劇照)

全片以Sammi同小齊為主線,不過副線就彈出個林海峰飾演真有錢人,IT才俊。在2000年科網熱下,當時李澤楷一個Skin Head、著西裝唔打呔的造型,成為IT Look的典範。所以林海峰一出場,大家就意會到佢扮緊小小超。而阿Jan的演出算係全片最大亮點,因為不單止造型似,連帶說話語氣、速度、停頓位,到棚哨牙,都似到一個點!

聽埋主題曲《玻璃鞋》



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。