《閨蜜2》黃真真親解延期之謎 因薛凱琪裸睡沙灘過唔到電檢？
撰文：胡劍威
出版：更新：
《閨蜜2》由黃真真執導，薛凱琪、張鈞甯和陳意涵落力演出。
薛凱琪想追有錢大佬可惜烏龍百出，引發笑料。
由薛凱琪、張鈞甯和陳意涵三位女星主演、本地知名女導演黃真真製作的《閨蜜2》，開拍多時但卻多次延期上映，現在終於鐵定三八婦女節同大家見面。日前黃真真就在社交平台開Live，向大家解釋為何電影會遲遲未上畫，原來係鏡頭太性感累事！話說片中有一幕，三位女主角赤裸躺在沙灘，搞到過唔到電檢，她表示：「尺度上有敏感的地方，因為（她們）冇著衫，比較sexy，電檢同其他方面都要研究，需要剪輯，但我又唔捨得剪，剪少少剪少少咁，結果一拖再拖，但宜家所有問題都解決晒。」聽到導演咁講，反而令人更想睇喎！
雖然傳說中的性感沙灘戲就未有得睇，不過片商近日又再公開一些新劇照，從中所見薛凱琪與張鈞甯不止衣著性感，還有搞笑的「爭仔」情節。故事中二人為了快將結婚的陳意涵，舉行婚前單身越南之旅，但卻因為一名靚仔又有錢的黑社會大佬展開爭奪戰。兩人在大宅內比拼歌喉，張鈞甯竟能流利地用越南話唱歌？原來張鈞甯為了拍攝此戲份，事前花了一段時間苦練越南話，到現場再配上「貓紙」，才能順利完成。另外薛凱琪與黑社會大佬在床上纏綿，以為成功？可惜最後卻在房內闖禍，繼而要與張鈞甯及陳意涵，三女展開大逃亡……至於《閨蜜2》3月8日上映，黃真真表示：「三八婦女節很適合，當日女士們可以放低家庭，同姊妹享受婦女節，enjoy《閨蜜2》。」
張鈞甯識講越南話？原來有貓紙，啲拼音仲勁好笑。