【情人節 ‧ 多圖】跟住志明去拍拖 烙印科林示範浪漫打卡攻略

撰文:
最後更新日期:

今日係情人節,情侶們諗好點同另一半過未呢?如果呢刻先訂位訂花買飛,就真係太遲。有冇啲即食唔使同人逼又免費嘅方案呢?

情人節無非想浪漫下,然後向大家放閃,有冇諗過跟住《志明與春嬌》電影系列的足跡,去返相關景點打卡呢?我哋今次就搵嚟因合唱《十萬個激嬲我的理由》做住短暫情人嘅駱胤鳴同科琳,去四個景點教大家閃一閃。

攝影︰江智騫

「啱Channel@gmail.com」,你記得嗎?(劇照)

在日光位拍攝,效果最自然最好。(江智騫 攝)

必去:牛頭角志明橋

講到《志明與春嬌》系列首選景點,必定係二人認識後,在牛頭角天橋進行抄牌活動一幕。該景點上年在《春嬌救志明》上映時,更掀起過一陣打卡潮,爭相去影張Selfie,甚至爬上天橋頂拍下「最獨特」一面,險象橫生,搞到兩位主角千嬅同余文樂都要出來勸大家適可而止。

其實條橋本身已經好正,在橋內影已經夠晒靚,仲似足劇照添。科林︰「我之前都在觀塘區返工,久不久都會行經這條橋,但從未覺得有咩特別,直至彭浩翔拍出來,你先覺得點解香港會有條咁靚嘅橋!」駱胤鳴︰「一見到條橋我就即刻諗起『armchannel@gmail.com』(戲中情節),如果一對情侶大家都喜歡這套電影,來到打卡是好Sweet的。」

橋上有好多有趣位,可以俾大家拍惡搞相。(江智騫 攝)

點去:牛頭角地鐵站,沿隧道過對面的偉業街,再往九龍灣方向行,去到大業街花園就會見到其中一個天橋入口。
打卡貼士︰最好在日光時段拍,尤其在窗口旁取景,效果最好。如果想有劇照feel,就要搵途人幫手影,放心,這裡仍然是情侶勝地,要搵人幫手唔難。

後巷都變拍拖勝地,多得電影效應。(劇照)

位於太古廣場的後巷,牆上的質感非常有feel,加上滲入的日光,真係上鏡靚過實景。(江智騫 攝)

夠方便:金鐘後巷扮邂逅


戲中志明和春嬌的感情,是在後巷「打邊爐」打返來的,而這個邊爐地就位於金鐘太古廣場旁邊的一條小巷。該巷咁出名除了因為套戲帶起,更因為夠隱閉,是最佳的「蛇竇」。至於一對情侶,就算唔吸煙,都可以過來走一轉,仲可能有機會望到膠袋空中轉轉轉的場景,都幾靚。

駱胤鳴沒有吸煙習慣,不過就認同這個地方私隱度高,雖然稱不上甚麼浪漫地,但都可以當電影景點去到此一遊。至於聲稱平時只係「陪朋友打邊爐」的科林,就覺得借打火機借到抄牌拍埋拖,真係男士們最佳的FF情節。「唔好話借火機,有時搭巴士都會諗,隔籬位靚女會唔會借故同自己搭訕呢?佢又會唔會瞓着唔小心挨落嚟呢?」深信科林都係為訪問效果而咁樣講,科林太唔好擺喺心。

set個腳架,扮有mood都得。(江智騫 攝)

點去:於金鐘站落車行,往太古廣場出口向左手面行會見到一條小巷,行到盡頭便是。
打卡貼士︰由於地點較隱閉,為安全起見最好都係朝早前往。如果要拍出電影感覺,用自拍神棍自拍,有微微低炒效果最好。

其實去到金鐘另一邊,近政總附近個公園,都係影相勝地。(江智騫 攝)

唔知有幾多段愛情故事,都係由7-11開始呢?(影片截圖)

食叮叮意粉都可以咁浪漫,多得彭浩翔為男士們銀包著想。(江智騫 攝)

醫肚:灣仔7仔意粉餐

打卡唔會飽的,點都要搵嘢食,如果跟住志明去搵食,第一集Brenda「試圖行騙」台灣仔,位於牛頭角的康祥茶餐廳就夠經濟實惠,可惜茶餐廳早前已結業。高級少少,去第三集一班姊妹為春嬌唱打氣歌《傳說》的西環茶家都唔錯,可惜又執埋,真係生意難撈。

結果經大家「嚴選」,決定延續窮遊精神,索性去灣仔7仔食叮叮肉醬意粉。該7仔係第一集志明飲醉酒在收銀叫「六個六」的取景地,至於意粉,就係志明最愛,愛到春嬌要搵人由香港外賣到北京俾佢食。個餐再平都唔緊要,但緊要有共鳴,食得開心。雖然身為女士代表的駱胤鳴就話︰「我就唔係幾鍾意食喇,但如果男朋友有偏愛都會陪佢。」相信要搵一個肯陪你捱叮叮意少的女友,都唔難喎!

隔住塊玻璃影,感覺一絕。(江智騫 攝)

點去:位於灣仔港灣道,於會展天橋行落去就即到。
打卡貼士︰男士們揸機,最好隔住塊玻璃影落去,而女朋友記得要扮漫不經意地食意粉,咁就營造出一份唯美的電影感啦。

戲中的西環碼頭主打夜景,其實黃昏更正。(劇照)

攬攬抱抱,係咪情人節都要做啦!(江智騫 攝)

最浪漫:西環碼頭睇日落

去到第三集《春嬌救志明》,志明在西環碼頭放狗時,遇到女神歐鎧淳,從而發生「走狗」事件。就連科林都懷疑︰「係咪真係有咁多靚女呀?」電影在夜晚取景,重點係睇人跑步,不過一對情侶過來就唔好等夜晚啦,可以早少少來影天空之鏡,亦可爭取黃昏的Magic Hour,睇日落影日落都非常正。

明明係碼頭一個,影出來就幾好睇。(江智騫 攝)

點去:於香港大學站 B2 出口出,步行約15分鐘便到。
打卡貼士︰由於碼頭是卸貨區,行經時要小心車輛,另外亦要留意日落時間,把握好黃昏最靚時刻。

把握Magic Hour是王道。(江智騫 攝)

翻滾之選︰漫春天

如果要跟足志明的行程,兩人情到濃時,最後一站不得不提漫春天。不過又學志明話齋︰「有啲嘢唔一定要一晚做晒,我哋又唔係趕時間!」再唔係浪漫到底,返屋企玩乾冰都唔錯。

不過今日咁好日,漫春天應該Full House,索性返屋企玩乾冰啦!(劇照)

《十萬個激嬲我的理由》MV
其實駱胤鳴同科林今次除了要跟住志明去拍拖,兩位趁情人節仲推新合唱歌《十萬個激嬲我的理由》,咁Sweet的日子,大家就無謂激嬲對方,有咩唔著,聽首歌算啦好嗎?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。