【我的情敵女婿】劉江過年短訊祝賀親友 反被回敬金句︰講呢啲
撰文：許育民
出版：更新：
電影《我的情敵女婿》找來多位演員客串，當中不乏一眾TVB藝人，其中劉江跟秦煌便在一場與黑仔（姜皓文）對賭戲上就飾演賭客。
等埋位期間，大家講起劉江的潛力圖︰「講呢啲」呢句說話其實並非劉江所創，其中一次他更「身受其陷」，被呢句說話考起！
葉念琛是標準電視迷，最愛跟電視藝人合作，今次《我的情敵女婿》就搵到金句王劉江。
參與呢場賭局的還有黃子雄。
《我的情敵女婿》由葉念琛執導，他是位標準的電視迷，故不時都找來大批電視藝員參與在自己作品中。其中一場講一班富豪，要跟病態賭徒黑仔強（姜皓文 飾）對賭，而呢班富貴賭客，分別由劉江、秦煌等飾演。劇情講到其中一局賭注已經好大，秦煌使用激將法，笑劉江賭到咁大，使唔使打電話問問屋企隻老虎乸，不過呢句說話激唔起佢把火，仲秒速地以金句︰「講呢啲」神回。
其實呢三粒字並非出自劉江把口，而係由早幾年網民改圖得來，畫面來自劉江參與演出的《拳王》其中一幕，由於表情極有趣，故網民修改對白為「講呢啲」，並成為潛力圖，在各大討論區流傳成為經典。
拍攝完畢，劉江提起關於這金句的笑話。話說有年過年，劉江要開工，友人以WhatsApp傳上一堆祝賀說話，咁有心當然要全數接收，他並匆匆以「大家咁話」來回覆。殊不知對方回他一句︰「講呢啲！」當時劉江根本未知呢三粒字和自己「有關」，見對方這樣回覆都一臉茫然，更心諗︰「過年唔講呢啲講邊啲呀？」到事後才知原來這是一句潮語，諗起都好笑。