【棟篤特工】黃子華爆10大製作秘聞 「佘詩曼本來係搵我開劇先」

撰文:許育民
出版:更新:

由黃子華、佘詩曼主演的賀歲片《棟篤特工》,上畫4日已大收2,000萬,徹徹底底為子華的「票房毒藥」封號除名。為隆重其事,昨晚兩位便聯同一眾幕後製作團隊齊齊開Live同大家傾偈,期間更無意中爆出大大小小的製作秘聞,樣樣都過癮有趣,而家就同大家結集其中10大。

昨晚大家不停傾如果過4,000萬要點,過5,000萬又要點,好有創意。

01. 足本長達160分鐘

有不少觀眾看過《棟篤特工》後,都話節奏太快太急,而且全片100分鐘又有大量串星間場,有人表示看到吃不消。子華解釋其實電影本身拍了接近160分鐘,但礙於排片關係,一定要忍痛割愛剪到100分鐘內。子華說︰「我都想大家有機會睇到一個常速版,要睇下有冇機會。」在場嘉賓提及當年《少林足球》因為大收,特別推出一個加長版叫大家入戲院睇多次,而家《棟篤特工》都咁好反應,要睇足本其實唔難,只要大家一齊集氣,推高票房,等老闆唔推個足本都唔得。

子華與阿佘2009年合作過《絕代商驕》,今次再聚就再掀高峰。(劇照)

02. 原先唔係開戲,係開劇

子華加阿佘,自2009年合作完《絕代商驕》,雖然收視爆升大受歡迎,但一直都未有合作,直至今次《棟篤特工》。但原來拍板話要拍電影前,阿佘原本係想搵子華拍劇的。佘詩曼說︰「因為我仲有20集的劇集約,於是就諗起子華睇下佢有冇興趣。」殊不知傾談途中,經身邊人的推波助瀾,就變成拍電影,世事就係咁奇妙。但話時話,張20集劇集約其實都可以照樣搵子華傾落去,大家都好想睇下三水妹同麥提爽(《絕代商驕》角色名)的再度合作。

而家阿佘係飾演保安局長,好難想像如果係忍者,會變成點?(劇照)

03. 阿佘角色本來係忍者?

現在大家睇到的劇情,阿佘在戲中是飾演由女警爬升至保安局長的Madam,但原來本身的劇本初稿,係要阿佘飾演一名忍者。雖然在Live中幾位爆完呢個驚天秘聞後一味大笑冇再講落去,但成件事就更添幾分懸疑,好想知到底劇本最初係想搞乜。

子華原本想搵蘇施黃夥拍君如打麻雀,可惜被請食檸檬。(劇照)

04. 子華有搵過蘇施黃客串

現在戲中連同一眾KOL及YouTuber,有多達40位串星貫穿,子華要多謝監製陳穎倫一手包辦所有聯絡,連許冠文、譚詠麟、鄭秀文、楊千嬅都俾佢搵到。其實子華都有出過力,經佢出手的有兩位,分別係白只同蘇施黃,「本來想叫蘇施黃做吳君如其中一隻麻雀腳,但佢就冇興趣。」結果邀請兩位,最終得白只到場,成功率係50%。

【棟篤特工】與阿佘開Live謝票 黃子華︰開完戒毒會唔再被人睇小【棟篤特工】子華碌爆卡搵貼地串星 龍婆方麗娟Dickson連環爆gag

05. 最憎唱主題曲

電影的主題曲《Final Calling》係由鄭欣宜主唱, featuring黃子華的「鐙蹬瞪鄧 鐙蹬瞪鄧」,子華稱唱得非常過癮,但原來佢本身係拒絕。子華說︰「當時導演帶住幾個人來,同我講話想我唱番主題曲,我未聽Demo就大叫︰『我最憎唱主題曲,又唔係唱得好聽。』原來導演背後就係作曲同填詞人,好尷尬。」不過當子華聽過Demo發現自己只需唱「鐙蹬瞪鄧 鐙蹬瞪鄧」時又覺得OK。子華說︰「要讚負責唱Demo位朋友,佢將我最衰衰格的一面扮到出來,令我好有興趣。」

+16

06. 兩公升酒堅一take過飲晒

戲中有幕子華要將一碗約兩公升的湯加薄荷酒一飲而盡,鏡頭所見子華親身上陣半分鐘一飲而盡,事實上現場亦真係一take過搞掂。「導演想我飲有顏色嘅嘢,所以我選擇加薄荷酒,因為如果叫道具大哥整一啲有顏色嘅嘢俾我飲,我會仲驚。」

子華個毒男造型,其實好神似。(劇照)

07. 掩嘴講嘢演出毒男謙虛

有細心的網民睇到子華在戲中扮演毒男時,講親對白都特別要掩嘴,問其原因,原來係想表達毒男的一份謙虛。導演說︰「毒男係比較怕醜,同人講嘢時會好唔自然,所以特別加入呢個小動作。」

【棟篤特工】上映2日票房達1100萬 單日入場人次更超越《黑豹》【棟篤特工】黃子華拍片鳴謝28位串星 「多謝大家拯救票房毒藥」

08. 導演原來合作過《一蚊雞保鑣》

今次為子華成功脫毒的導演叫張家傑,原來佢同子華都有淵源,早在拍《一蚊雞保鑣》時已擔任第二副導,即係今次齊齊脫毒。值得一提,當時做《一蚊雞保鑣》第一副導的叫陸劍青,即係現時香港華語片票房冠軍《寒戰II》的導演之一。

一部曾只收11萬的《一蚊雞保鑣》,隨子華成功脫毒,定必再次捧為經典。(網上圖片)

09. 導演差啲想放棄

《棟篤特工》劇本籌備達兩年,過程漫長之餘,大家更十五十六未知開唔開得成,雖然大家都已經先出糧,但冇諗過份糧要攤分兩年去使。而其中一次開完會後,導演就WhatsApp去大Group同大家講︰「各位,我嘅工作到此為止,我仲要養家活兒。」真係一字一淚,幸好最後都順利開得成。

《棟篤特工》單是劇本都籌備兩年,以現在票房表現,再次證明劇本真係好重要。(劇照)

10. 度橋良伴︰腿蛋治

唔好以為電影人度橋就一定係文華酒店café,其實劇組留守最長時間的,是銅鑼灣某茶餐廳,而大家賴以維生的就係店中的名物︰招牌腿蛋治。雖然幾位講到好出名咁,但睇番各人表情,都係苦笑多,睇怕都會有一年半載唔想再食腿蛋治。