【專訪】做足37年配角近年幾乎冇戲拍 龍天生:等緊導演俾機會我

撰文:
最後更新日期:

某程度上,電影圈是個很殘酷的世界,大製作電影必先要有知名度高的男女主角,而要成為主角,演員又必先有一副足夠討好觀眾的模樣;曾經在《嚦咕嚦咕新年財》及《鍾無艷》等喜劇電影中飾演大配角的龍天生,自認長相其貌不揚的他一直飾演「騎呢」配角,入行37年都無緣當一次真正的主角。

攝影:梁碧玲

龍天生(右)獲杜sir賞識,邀請他參演2002年的賀歲電影《嚦咕嚦咕新年財》。

龍天生成長於柴灣木屋區,出身貧困家庭,7歲時父親離世,由擔任泥工的母親撫養成人,後來與母親姊姊搬到北角春秧街的板間房居住,「嗰陣我派咗去一間男校讀書,所以我好怕醜,當時學校要我哋每人都有個興趣,學校就派咗話劇俾我,仲識咗當時師弟高志森,一齊搞話劇,咁我先發現原來自己鍾意演戲。」他笑指演戲的滋味會令人上癮,站在台上可令他忘卻所有害羞的感覺,「後來我會考之後,就考到無綫電視藝員訓練班,變咗朝早返學,夜晚返訓練班,後來直頭學都唔返,淨係返訓練班。」龍天生笑言,當時入去受訓滿懷熱誠,自覺可以成為男主角,「當時訓練班教學好全面,演技、配音等都有教,當年有4,000人報考,考到嘅人得三十幾個,同期有好多人,有陳玉蓮、呂良偉、樓南光仲有阿燦廖偉雄,個個都係一個月俾30蚊學費TVB。」

天生(左)坦言拍攝《鍾無艷》時,親身感受到梅姐是個無架子、關心劇組每個人的巨星。

在藝員訓練班畢業後,龍天生成功畢業之餘,更獲無綫簽約聘用,1978年時參演了第一部電視劇《倚天層龍記》,「TVB唔係個個都肯簽,當年TVB本身連呂良偉都唔簽啊!」他笑說。由1978年起,龍天生先後參演過25部電視劇集,其中一部就是,令他的同期訓練班同學「阿燦」廖偉雄爆紅的《網中人》,「當年我飾演角色叫大圈光,阿燦就係演程燦,其實當時係我同阿燦之爭,咁最後選中佢啦。」入行至今已經接近40年,龍天生在初入行時已涉足電影,但從未當過主角,現時已轉型為配音員的他,笑言現在已走過「搏殺」時期,而且也有了自己心目中的代表作,「其中一部係徐克導演嘅《第一類型危險》,佢呢個人好有創造力,而且真係鐵人嚟,為咗拍戲可以幾日幾夜唔瞓覺,可以同佢合作都叫圓到心願。」

天生的面孔時常表情豐富,即使脫下戲服,還是能輕易認出他就是《鍾無艷》中的大臣之一。

37年從未當過主角,我問龍天生:「有冇覺得遺憾?」他說:「我唔識分一套戲邊個係主角,邊個係配角,就算成場戲我得『喂』咁樣一句對白,總之我講果對白嗰刻,我就係主角!」他續說:「就算得一句對白,我都要承上,仲要接下,即係要接到對上一個人講嘅對白語氣,又要交到戲俾下一個講對白嘅人,每個演員都有好大責任……其實唔需要去計較幾多句對白,你係好戲嘅,好似葉德嫻咁,一句對白就拎最佳女配角。」但畢竟龍天生都是一個愛演戲的人,多少也渴望做主角吧?「有得做梗係好,冇亦無妨,如果下下想做主角,好似拍劇咁,今集我戲份多,下集突然又得一句對白,你好在意的話,真係會癲。」跟他聊天期間,龍天生不斷形容自己其貌不揚,你以為是貶意?非也。「好在我生得騎呢咋,EQ夠高,容易接受自己喺低位,好似張國榮咁,我相信佢心理壓力好大,有心理病,我用觀眾角去睇佢,覺得唔多唔少都因為佢處於高位,尤其身處影視圈,當大家將所有聚光燈放晒喺你身上時,突然冇咗,其實好難接受。」

現時已經轉型為配音員的天生,曾為Pixar動畫《玩轉極樂園》擔任配音。

龍天生坦言,在這數十年的演戲生涯裡,他遇過許多「恩人」,而其中一個就是「杜sir」杜琪峯,「佢係藝進同學會會長永遠榮譽會長,佢知我做過演員,又做過副導演,於是搵我幫個會手搞舞台劇及慈善show。」在藝進同學會工作3年期間,他跟杜sir算是一場朋友,後來更邀請他參演《嚦咕嚦咕新年財》及《鍾無艷》,「佢知我夠騎呢嘛!我夠騎呢就有好處,除咗演唔到主角之外,其他角色我全部都可以演,其實杜sir平日個人同佢拍戲嗰陣係兩個人,佢係一個好放手俾演員演戲嘅導演,咩都安排好晒,佢炆都係因為安排好啦,啲人都唔識做,但對演員呢,你唔識演,佢仲會示範俾你睇點演。」

提起當年的藝員訓練班,天生表現得特別興奮,更笑說前陣子才出席了40周年聚會,席間有呂良偉、廖偉雄等。(受訪者提供圖片)

天生憶述:「《鍾無艷》有個shot係講踢足球,場戲講梅姐演嘅昏君齊宣王,同我哋幾個演大臣嘅演員踢足球,拍緊其中一個shot嗰陣,杜sir就問我哋可唔可以好似英足有個球員咁,一贏波就跪地剷落草皮,佢即場示範俾我哋睇。」龍天生說起「舊時」,表情相當豐富,他對演戲的熱情,並非一般人可以理解,但他自從2003年參演過《愛在陽光下》後,相隔12年才再演出《五個小孩的校長》,而且至今亦再無作品,「我唔係唔演,一直都好想演戲,係冇導演搵我,我一直等緊機會。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。