【獨家．脫皮爸爸】吳鎮宇由20歲演到79　扮失智老人靈堂失禁　　

電影《脫皮爸爸》今日上畫，戲中的吳鎮宇要由20多歲演到79歲，扮後生固然難，但花4、5個鐘化個老妝都唔係輕鬆。
吳鎮宇在拍攝時，就化了一個69歲的老妝，為想試試反應，鎮宇忽發其想以呢個老妝行落街，買雜誌、去街市買魚，睇下有冇穿崩。

電影中，鎮宇無論是演20歲，還是79歲，每個階段都要悉心化妝，其中最花時間是69和79這兩個階段，閒閒地都要花4、5個小時。其中69歲妝，因為要拍埋街景，於是鎮宇索性試完妝，就落街行一轉，睇下仲有冇人認得自己。

整個行程，由買雜誌到行街市，雖然都係人多的地方，但這個老人妝非常有水準，沿途都冇人認得出係鎮宇。加上模仿老人家的言行都相當神似，舖頭老闆都以為有個切切實實的老人家來幫襯一樣。

拍到79歲一節，角色上這位老人家會患上腦退化症，成為失智老人，無時無刻都在嚷著要食香蕉，對身邊的人和事都沒有印象。其中一幕，講他出席太太的喪禮，依舊只記得嚷著食香蕉，中途更當場失禁。拍攝這幕時，鎮宇都準確捕捉到老人家的舉動，就連失禁後在把玩尿液的細位都演埋出來，非常仔細。