【死侍2】曼聯驚變Deadpool隊 另類紅魔鬼佔領奧脫福

撰文:
最後更新日期:

講起「紅魔鬼」大家即時聯想起英格蘭超級聯賽球隊曼聯(Manchester United),這隻「紅魔鬼」多年來稱霸球壇,在球場上橫行無忌,但近日有另一隻「紅魔鬼」輕易佔領了曼聯主場奧脫福(Old Trafford)球場,令一眾球員大感不滿,原來是出名麻煩愛惹事的Marvel超級英雄「死侍」(Deadpool)在搞鬼。

新片《死侍2》(Deadpool 2)今日在香港上映,近日電影的宣傳攻勢一浪接一浪,繼日前公開與前曼聯球星碧咸(David Beckham)合作拍攝的宣傳短片後,「死侍」與真‧曼聯球星一齊拍攝的短片亦於昨日曝光。片段開始,有位小朋友著住一身曼聯Look準備入場捧愛隊,豈料見到一幅超巨型「死侍」橫額,忍唔住爆出一句:「What the...」。

奧脫福門口變成咁樣。(網上圖片)

球員名變晒Deadpool(死侍)。(網上圖片)

連加特見到一地「死侍」就咁嘅樣。(網上圖片)

不止奧脫福球場門口被「死侍」佔領,他更爬到每位球員身上…的球衣,球衣背上並非印上球員的名字,而是一律印成「Deadpool」,仲換上一系列「死侍」嘜頭的精品,難怪中場連加特(Jesse Lingard)都皺晒眉爆粗以示不滿,其他曼聯球員如加歷克(Michael Carrick)及山齊士(Alexis Sánchez)等都出現「黑人問號」。

加歷克不滿要著「死侍」拖鞋。(網上圖片)

小食部變「死侍」。(網上圖片)

每月最佳球員都係佢。(網上圖片)

周星馳主演的《少林足球》入面,「魔鬼隊」教練「強雄」(謝賢飾)隻手遮天,非法氣燄地說:「仲球證、旁證、足協、足總、足委,全部都係我嘅人」,但「死侍」仲犀利利,入侵埋曼聯的小賣部,甚至每月最佳球員都是他,球員馬達嬲嬲豬咁話:「佢以為自己係邊個?」。而坐在看台上觀察一切的「死侍」就投訴普巴(Paul Pogba)無著上「官方死侍護膝」,仲話要叫領隊摩連奴(Jose Mourinho)搞搞佢。

連旁證支旗都唔放過。(網上圖片)

馬達話:「宜家咩事先?」(網上圖片)

紅魔鬼Logo變成「死侍」Logo。(網上圖片)

雖然「死侍」與「復仇者聯盟」(Avengers)都出於同門Marvel,但兩邊屬於不同電影公司,《死侍2》與《復仇者聯盟3:無限之戰》(Avengers: Infinity War)又撞期上映,飾演「死侍」的賴恩雷諾士(Ryan Reynolds)都忍唔住抽水話:「當你拍續集,一係你就加倍宣傳,一係就俾《無限之戰》埋葬。」

咪又係「死侍」搞鬼!(網上圖片)

2016年首集《死侍》上映時,都有搵曼聯拍片宣傳,各位可在下面重溫一下:



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。