【康城影展‧冷知識】評審日睇2部戲好易做? 每部戲4個鐘走唔甩

撰文:
最後更新日期:
第71屆康城影展接近尾聲,大家開始關注獎項花落誰家。過去10多日,評審們都忙於睇戲、開會、去首映、開會……無時停。或者你會覺得,每年參選的作品不出20多部,有10幾日時間分,平均每日睇兩部戲,相當充裕吧!但其實當中有很多細節就要你勞心勞力。
作為評審主席,盛裝出席各大首映都是工作的一部分。(VCG)
以今年為例,展期由5月8日至19日,一共有12日,而參選正式競賽的電影就有21部,除開來算的確每日兩部都有找。不過據資深電影人麥聖希Gary解說,普通人睇部戲兩個鐘就真係兩個鐘,但以他們身份計,閒閒地都要預4、5個小時睇一部戲,到底時間花在哪裡?
近年康城都加以關注評審團的多元性,今年就有張震作為亞洲代表,前年就有首位新加坡代表邱金海導演。(VCG)
事關身為評審,多數都要出席該片的首映禮或特別場,而首映前一小時就是行紅地氈時間,所以預早一小時到場是基本要求,還未計及出席前的裝身時間。Gary還資料提供︰「好多時電影放映後,觀眾會站立拍掌拍足10至15分鐘以表尊敬,而且隨後又會有After Party,所以睇一套戲要4小時不是誇張。」照咁計,一日睇到兩至三部都好頂盡。
姬蒂白蘭芝為今屆評審主席,更多次為女權發聲。(VCG)
除此之外,睇完戲還有最重要的工作,就是跟其他評審開會,決定評分及獎項誰屬。雖然開會的次數取決於主席的慣性,但兩、三日開一次都是基本消費。再者,身為評審,很多品牌活動都會邀請出席,又有很多電影人的活動或其他首映要賞面撐場,所以十多日的行程,時間都排得密密麻麻。只可以講一句,評審真係唔易做。


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。