【洩密者們】周秀娜死老公仲俾人打 慘被楊柳青撻生魚
撰文：洪曉璇
出版：更新：
周秀娜（Chrissie）呢排曝光率甚高，不過喺電視劇同電影中都成日俾人恰，「純熙」由古裝走去現代，在邱禮濤警匪動作劇情新片《洩密者們》中，娜姐角色命運坎坷，比「純熙」更苦命。
周秀娜新戲中面對丈夫離世。
片中娜姐和施祖男飾演一對夫妻，施祖男離奇去世後，娜姐就要拎着一件重要物件從馬來西亞着草返港，途中被跟蹤危機四伏，到她在港入住酒店，卻遇上飾演殺手、假扮酒店職員的楊柳青，呢幕戲娜姐就陰功啦，手無搏雞之力的她被楊柳青㩒住打，將她掟落梳化再碌埋落地，成場戲係全天候撻生魚。不過娜姐非常專業，動作俐落，拍攝相當順利。
近一兩年周秀娜被讚演技大躍進。
娜姐說：「戲中我係個時裝設計師，老公過身之後，我要將破案證據送俾相關嘅人，我一向好想試警匪片，因為香港嘅警匪片係好精彩。我嘅角色係要由馬來西亞嚟香港，好擔驚受怕，全程得我一個女人，我自己都緊張到癲咗；至於場動作戲，之前係溝通得好好，所以拍嘅時候好安全、好順利。」反而楊柳青就騰雞得多，她說：「大家都知 Chrissie 好FIT又輕，我好驚整到佢呀，拍之前大家有溝通，要就吓力度。」
周秀娜慘被楊柳青撻生魚。