【復仇者x世界盃】Avengers球隊正選陣容　羅拔唐尼心水原來係…

2018世界盃分組賽即將完成，星期六晚就會開始16強賽事。今屆多隊傳統勁旅爆冷失分甚至出局，令人大跌眼鏡，網友紛紛FF心目中最強隊伍。IronMan羅拔唐尼呢日喺官方Facebook貼出一張網友貼圖，球員全部都係復仇者聯盟成員，真正係無得輸呀﹗不過電影中有成50多位超級英雄，呢次嘅11人陣容又係咪大家心水呢？

《復仇者聯盟3：無限之戰》4月尾上映時，已經有外國媒體將呢班超級英雄，「組隊」踢足球打籃球，仲寫埋咩陣容出場最無敵。Iron Man羅拔唐尼襯世界盃都轉貼一張網友P圖，寫上：「Does this make Fury or Black Widow the coach?（Fury或黑寡婦會來做教練嗎？）」

【復仇者聯盟4】為防劇透　Marvel總裁︰化灰英雄不能在預告登場

抵死設定在細節
圖中見到有11位超級英雄正選上陣，包括雷神、幻視、WAR MACHINE、HULK、奇異博士、飛隼、IRON MAN、星爵、黑豹、美國隊長同埋蜘蛛俠。佢地著上整齊球衣，胸前印上「贊助商」嘅LOGO為Tony stark嘅STARK INDUSTRIES，實屬理所當然。睇真啲原來佢地踢嘅唔係World Cup而係Infinity Cup，個獎盃仲要係Thonas嘅無限手套添﹗

【復仇者聯盟】英雄武器勁足料　雷神戰鎚重80磅無限手套全人手製

英雄排陣有得解
正如喺《復仇者聯盟3：無限之戰》中，總要分不同崗位分工合作，咁先有最大協同效應。有資深球迷兼影迷就話，呢隊最適合踢4-4-2陣式，黑豹同雷神做雙箭頭前鋒，跑起嚟敵隊想追都幾難；中場有美國隊長、星爵、蜘蛛俠同IRON MAN，美國隊長喺度指揮大局，隨時因應賽事轉換戰術；後衛有Hulk、WAR MACHINE、幻視及飛隼，銅牆鐵壁想攻入都真係好難；如果敵對真係咁勁可以殺到入禁區，仲有奇異博士守龍門，必要時出招將個波轉移去另一空間，佢地想輸都真係好難啦﹗