【有片】《92黑玫瑰對黑玫瑰》上映26周年 梁家輝英泥頭最經典

撰文:
最後更新日期:

經典港產喜劇,周星馳嘅作品應該可以全數入選,但,除咗星爺呢?喺港產片最輝煌嘅年代其實仲有好多選擇。1992年7月2日喺香港正式公映嘅《92黑玫瑰對黑玫瑰》,由不被看好,憑口碑氣勢如虹,連續上映5個多月﹗呢套戲更令梁家輝馮寶寶於翌年金像獎,一舉奪下最佳男主角及最佳女配角,向經典致敬同時締造一代經典。

《92黑玫瑰對黑玫瑰》今日剛好上映26周年。(網上圖片)

《92黑玫瑰對黑玫瑰》由劉鎮偉執導,梁家輝、邵美琪、毛舜筠、黃韻詩、馮寶寶主演,本想向粵語長片致敬,演員大多正經八百講對白,但同時開創無厘頭以外嘅喜劇走向。梁家輝喺呢套戲以前,演正劇為主,即使喺《表姐,你好嘢﹗》亦非擔任搞笑崗位。《92黑玫瑰對黑玫瑰》發掘出梁家輝嘅喜劇細胞,冷面笑匠,撚聲但表情正經講對白,講講下忽然唱歌兼起舞,令人忍俊不禁。

戲中梁家輝依舊英偉靚仔,但正正就係那份懶正經,令觀眾捧腹大笑。(網上圖片)

戲中演員不時會突然唱歌,以歌詞表達情緒令人忍俊不禁。改編自翁倩玉日文作品《たそがれの赤い月》嘅《你回來吧》,梁家輝頂住滿頭英泥,一邊唱歌一邊急住向黃韻詩解釋;仲有梁家輝對著毛舜筠唱「小寶寶,食蛋糕,飯仔mun mun叔叔餵到,食過長大,大過冇壞,飯仔mun mun最鶯孤孤」;當然唔少得翻唱自譚炳文嘅《舊歡如夢》,不過大家最熟悉嘅版本,應該會係同年年尾,李克勤食住個勢翻唱,又唱又跳嘅版本,難得係同樣成為李克勤歌唱事業中的污點與經典。

頂住成頭英泥唱歌,明明佢個樣好認真,但一路睇一路好難忍笑。(影片截圖)

1992年可算係港產片豐收年,由年初嘅《家有囍事》到揚威國際嘅《阮玲玉》,當年最高票房頭5位全部由星爺包辦,故此92年又稱為周星馳年。喺星爺橫掃影壇嘅同時,金像獎當屆影帝亦是由喜劇封帝,當年入圍最佳男主角有周星馳(《審死官》)、成龍(《警察故事3超級警察》)、向華強(《藍江傳之反飛組風雲》)以及梁家輝以兩套戲(《棋王》、《92黑玫瑰對黑玫瑰》)。最終憑喜劇封帝嘅卻不是周星馳,而係首次挑戰喜劇角色嘅梁家輝。此後佢亦接下多套喜劇,奠定其地位。

梁家輝馮寶寶於翌年金像獎,一舉奪下金像獎最佳男主角及最佳女配角。(影片截圖)

+3
+2


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。