彭浩翔拍灘叔劉翁10月開棟篤笑 「我哋唔會溝通，抄我橋點算？」
當棟篤笑之神黃子華宣布做埋今次26場show後，便「金盆𠺘口」不幹，這邊廂就有個老處下海，講緊係彭浩翔，佢仲拉埋鄒凱光同劉翁（Sunny Lau）落水一齊做，叫《翔揸劉灘之潮潮的吹》。
問到老處下海，點解唔自己一人承擔？彭浩翔︰「棟篤笑係我一直好想做，但唔敢做的表演，現在有人陪我冇咁驚。最緊要係萬一唔好笑，我都有得賴佢兩個。」
就今次棟篤笑，彭浩翔接受《香港01》的訪問，首先追問個Show叫「潮潮的吹」，到底會唔會鹹鹹地，最終要列三級？「暫時度的內容都係冇粗口冇三級內容，到時講到即興爆兩句就唔知。」似乎想聽《低俗喜劇》的水平，應該唔會係今次。至於點解要玩三人行，彭浩翔答得好直接︰「因為驚！棟篤笑係我一直好想做，但唔敢做的表演。拍電影我好想做，冇人話俾我拍，我都敢去拍，唯獨呢樣嘢真係驚。之前睇完卓韻芝個Show，我都讚佢真係好勁！」
其實3位份屬老友，灘叔一直有合作，佢講得大家都知，劉翁又係咪見佢做節目talk得，先預佢一份？彭浩翔︰「我早在《公主復仇記》已經搵佢影劇照，但當時已經發現佢好鍾意講嘢，我成日話佢劇照係要影唔係講呀！」到後來有人搵劉翁做節目，就見到他的實力。
【周末午夜場】《飛虎出征》鄒凱光爛Gag硬撼杜汶澤 精句大結集
平時吹水，3位都好樂在其中，時不時都提議不如開Show啦！單係呢句戲言都講到無氣，但一直流於個吹字，直至今次突然話Book到場，冇得走數，真係要硬住頭皮去馬。彭浩翔︰「實係咁，你話度好稿先Book場，就一世都唔使做，今次個場突然有期，又有人肯投資，你就逼住要成事。」
【周末午夜場】《低俗喜劇》變神預言 彭浩翔︰唔想成日做預言家
由於場地細，又搞得兩場，所以單係內部認購已經去咗7、8成，難怪彭浩翔從未擔心過銷量。「我唔想咁多friend睇添呀！成班朋友入場，你講得唔好笑都總會有啲同情的笑聲，即係好似首映禮掌聲咁，唔會係真，最好全部拎出街賣，等我哋3個聽到真反應。」距離開Show仲有3個月，斷估3位都已經埋位開會度橋。「冇喎！因為我哋會每人負責一part，合作先表演只有一part，Solo內容我哋唔會俾意見，被佢哋抄我點算呀？」
棟篤笑鐵定10月25同26號，於灣仔演藝學院（APA）舉行，想買飛要留意喇！