【逆流大叔】吳鎮宇3個理由搵胡定欣做女主角:「首先要唔驚我」

撰文:
最後更新日期:

2002年的《衝上雲霄》,當時已是影帝級的吳鎮宇強勢返到TVB拍劇,一眾新人有幸跟影帝合作當然非常緊張,唯獨一個叫胡定欣,劇中合作有講有笑。

這次合作,令鎮宇記下這位演員,事隔多年,自己有機會出任電影《逆流大叔》的出品人,有機會揀女主角,在自訂的3大條件下︰未拍過電影、要有觀眾認識、仲要唔怕自己,鎮宇就醒起這個名字︰胡定欣。

攝影︰陳順禎

由《衝上雲霄》首次合作,然後到今次的《逆流大叔》。(陳順禎 攝)

兩位合作多年後,鎮宇親自促成電影上的首次合作。(陳順禎 攝)

《拳王》啞妹演得好

今次鎮宇可以話係為港產片無條件付出,甘願以零片酬參與拍攝,並成為該片的出品人。付出這麼多,當然有話事權,除了拍攝上的修改,選角更可以話事!吳鎮宇︰「開會傾選角,當然要問下吳鎮宇,他們都苦惱可以找甚麼人,所以我先收窄範圍,最好搵一個冇拍過電影的演員,但觀眾認識她,仲要不怕我。」範圍經這樣收窄,已經沒太多選擇,所以胡定欣成為首選。

胡定欣︰「係佢覺得我唔怕佢之嘛!」事源兩位拍《衝上雲霄》時,第一個合作場口,就要扮熟絡整蠱Sam哥,鎮宇向來Cool Cool地,就算笑都係點到即止,所以定欣都係戰戰兢兢,硬住頭皮拍埋去。不過相處耐了,的確又唔再怕佢。「有時候真的可以輕鬆放飯時,他突然會講一些好好笑的對答,這只是他的性格,絕對不是要刻意去營造一個怎樣的吳鎮宇。」

+2

任出品人,就是想大力支持香港電影。

這次合作後,鎮宇一直都有留意她,最深印象是在《拳王》中飾演的啞妹:「睇到定欣的演出,點解會演到啞妹呢個角色?她至少演出氣質不同,好多人只做了喜怒哀樂便算,這是電視的表演基調,但能夠演另一個人出來是更加重要。」對於這次獲邀,定欣都好喜出望外︰「他由我第一日入行已經識我,這麼多年都睇住我成長,好自然對我有點想法,去到今日他找我拍第一部電影,我相信總有他的原因,我只要做好自己本份就是。」

首次參與電影,入圍最佳新演員真係冇問題。(陳順禎 攝)

「GiGi演骨妹,做咩唔搵我演客人?」

不過作為出品人,鎮宇有更深層的計算,而且非常合理︰「因為我們是新導演(陳詠燊)執導,如果有位有經驗的新演員,到時起碼有機會入圍新導演及新演員提名,為套戲多添幾分色彩。」問到鎮宇點解今次有興趣當出品人,原來關Gigi(梁詠琪)事︰「在一個春茗活動上,我見到好多新導演,聽見Gigi做《骨妹》,吓?咁點解唔叫我演客人呀?然後又發現有部《點‧五步》,我都可以演教練喎!」

好多人把口話撐香港電影,但就流於得把口,如果俾鎮宇揀,佢想落手落腳做:「有人用自己的能力知名度幫手,做幕後係有幫助,但不夠幕前的帶動強,能夠有一位有名的演員參與一位新導演的作品,會令套戲上到戲院的機會多一點,這一種幫助會更實在。」這顆為香港電影賣力的心的確好好,「到時有人問我為香港電影做過乜,我唔係只係嗌口號架!行番落去幫一些新導演,是種傳承。」

可以透露,戲中定欣有不少搶眼造型,入場睇就知。

+2

鳴謝︰

吳鎮宇
化妝︰Kargo Leung
髮型︰Joe Kwong
服裝︰DEGAIA

胡定欣
化妝︰Cyrus Lee
髮型︰Matt Chiu @Xenter
服裝︰Monse & Alexander Wang from Lane Crawford

場地
馬哥孛羅香港酒店



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。