【無雙】周潤發鼓勵學生搵自己舞台:我都係邊做Boy邊讀訓練班

撰文:許育民
出版:更新:

周潤發跟導演莊文強出席電影《無雙》映後座談會,跟學生分享戲裡戲外的經驗。戲中其中一個主題,要找到合適自己的舞台才可以做到主角。兩位便回想尋找這個屬於自己舞台的經過。

當智叔叫學生們睇完唔好劇透,發哥反問咩叫劇透?「啊!穿橋」。(陳順禎攝)

發哥:每日收工就趕去訓練班

大家都知發哥是TVB訓練班出身,但當年訓練班學員冇錢收,還要交30元學費,所以當時發哥只好邊返工邊修讀。「初初搵食艱難,見人哋招考藝員覺得好玩我就去讀,當時要30蚊學費,那時候我在尖沙咀做Boy,負責送相機。每日6點半上堂,公司又俾我早少少收工,放工就搭4蚊的士去廣播道。當時都冇想一定會入行,只覺得讀完一年,就算不做演員,得到那份人生經驗都是好事。」從此就找到屬於自己的舞台。

【無雙】周潤發分享開槍藝術 真打郭富城心跳急升至180

發哥好興奮接到《無雙》這個角色,因為這個角色不是真人,未試過演。至於咩叫唔係真人?學發哥話齋:「唔好穿橋!」(陳順禎攝)

莊文強差一步就做咗廠佬

至於導演莊文強,原來他是理工校友,主修manufacturing engineer(製造業工程師)。莊文強:「當時我讀這一科,成績都好好,但想到將來要日日返工廠就不感興趣。」那時莊文強已經甚喜歡文化研究,於是隨即再去浸會修讀傳理系,並開始發現自己有寫劇本能力。「畢業就去跟曾志偉間公司做學徒,即使冇糧出都做,因為可以跟陳可辛學嘢,曾經做到戶口得番60蚊,先醒覺要搵份工,於是就去TVB做一份月薪$3800的編導,繼而投身到電影界。」雖然辛苦,但最終都找到合適的舞台。

【魯豫有約】周潤發拒絕為攞獎0片酬接戲  「要吃飯不是為拿獎」

莊文強差點就成為中港兩邊走的廠商,但現在拍戲都是要中港兩邊走。(陳順禎攝)

發哥有好工介紹

去到答問環節,學生踴躍發問,有位來自黑龍江的學生,便問發哥如何做到人生的主角,找到合適的舞台。發哥便問他想做甚麼工作?同學答:「想搵份人工幾好,又可以好似發哥一樣咁瀟灑的工作。」問題一出,全場嘩然,連智叔都反問你第一時間就問人工?

不過發哥就是好脾氣,仲真係有好工介紹:「喂!如果你想搵快錢,你去做看更,沒甚麼好做,兼職的話都是瞓覺,都萬幾蚊人工,你要把握!你又健碩又靚仔,洗碗唔好,洗碗辛苦。搵錢先,搵到錢就有理想,有理想就有舞台。」似是一番至理明言,但總是聽到人想發笑,發哥呢下神回,好嘢!

更多《無雙》精彩劇照