【林嶺東逝世】吳彥祖永遠懷念電影大師 杜汶澤憶導演親身跳碼頭

撰文:洪曉璇
出版:更新:

著名導演林嶺東於12月29日逝世,享年63歲。佢生前執導多套電影,大批同佢合作過嘅藝人都感到震驚,表示難以接受。杜汶澤、余文樂、舒淇等紛紛於社交網站留言悼念,而主演林嶺東2016年作品《沖天火》嘅吳彥祖,亦貼上合照懷緬呢位前輩。

忽然傳來林嶺東導演嘅死訊,圈中藝人無不婉惜。(資料圖片)

林嶺東近年只執導兩套戲,2015年嘅《迷城》及2016年嘅《沖天火》,而兩套戲原來佢都係為咗吳彥祖而拍:「其實《迷城》當初是開給Daniel拍的,不過在正式開鏡前,他的太太生了女兒,要做爸爸就來不到片場啦。」林大導指,Daniel有本名冊,上邊寫了很多香港導演的名字,其中「林嶺東」那一格是空着的。「那傢伙在『另類集郵』,所有導演都合作過了,唯獨欠我一個。」《迷城》合作落空,林導為咗承諾,翌年再開拍《沖天火》終促成合作。

林導演2016年接受《香港01》專訪時透露,出山連拍兩套電影,全因為滿足吳彥祖嘅「另類集郵」。(資料圖片)

呢份情誼Daniel亦銘記於心,聽到林導離世消息都非常感觸:「一起身見到著名香港導演林嶺東離世的噩耗。我對上一部主演的電影《沖天火》正正與林導合作。他執導的《龍虎風雲》、《監獄風雲》、《高度戒備》等經典電影,更是80年代已至90年代初電影新浪潮重要一環,成功將香港電影推向國際。我們痛失了一個真正的電影大師。願安息!我們會承傳你的遺志!」

Daniel上載同林導演嘅合照,感激並表示銘記佢對香港電影嘅貢獻。(吳彥祖IG)

曾參演電影《情逢敵手》而同林嶺東結緣嘅杜汶澤,亦於Facebook連發三個留言:「永遠不會忘記和你合作時,你在拍攝現場時對我說過,如何才能把電影拍好。我的演出和導演工作,亦深受你的教言影響。好記得有場戲,你叫我響遊艇頂層跳落去碼頭,我莫薑,話唔做,你諗都唔諗就飛咗落去,跌到爆缸。之後我唯有照做,傷曬,嗰一刻我覺得你係癲嘅。過咗好多年我做咗導演,我自己都癲埋。世上瘋狂熱愛拍戲嘅人,只佔極少數,你走咗,又再少一個。我尊敬的導演,更加所剩無幾。永遠的電影大師林嶺東導演,一路好走。」

杜汶澤分享當年拍攝《情逢敵手》時,林導演親身上陣試戲,令佢相當難忘。(杜汶澤FB)
+2