【星爺研究院】《食神》大隻仔全程冇衫着︰首日開工就要打星爺

撰文:
最後更新日期:

近日晚晚追《美味天王》,劇中對美食浮誇式演出,其實是模仿日本動畫《伙頭智多星》。這部動畫同樣觸動周星馳神經,除了在《他來自江湖》中率先扮演過,去到1996年,星爺首度自立門戶開辦星輝影業,創業作《食神》便揀選了美食這個題材。

電影中史提芬周及火雞姐固然吸引,不過那班廟街手足,個個奇人異士,同樣出類拔萃,當中包括還未被人認識的林雪、八両金,以及今集「星爺研究院」為大家介紹,一句︰「我叫你試下呀~」嚇窒觀眾的大隻雄︰徐志雄。

影片拍攝︰詹郭敏、呂榮棟

相片攝影︰葉志明

剪接︰呂榮棟

場地︰The Nathan Cellar@彌敦酒店

《食神》的大隻雄,真名徐志雄,真人不單止唔大隻,說話仲好溫文。(葉志明 攝)

試下呀~
《食神》看過近百次,每個情節與對白都倒背如流,一講︰「試下呀~」就知你講緊那位冇衫著,周時打大赤肋,自信心返埋嚟的排骨仔。好喇,咁到底佢叫咩名?角色名又係咩?「其實套戲入面都冇名,你叫我大隻雄啦!」他真名叫徐志雄。

筆者明顯受角色影響,相約徐志雄做訪問時,一心凝住他就是個兇神惡煞,一個唔好老脾真係會伸我落花園道鞭屍那種惡人,所以WhatsApp間都唔該前唔該後。直至接觸到真人,他說話輕描,舉止淡然,從未試過咁清新脫俗的感覺,所以對話未到第三句,已急不及待搶問︰「你真人都幾斯文喎!」

見到如此身形都自信心滿滿,人生充滿希望。(《食神》影片截圖)

「好多人都這樣說,可能周生就是見我這種外形,如果都惡得出樣,出來的反差會令觀眾眼前一亮,於是叫我演大隻雄這個角色。所以戲中的老粗性格不是周生發掘出來,是他給予我。」事實上徐志雄跟導演谷德昭是在加拿大讀書的好兄弟,後來谷回港做編劇導演,二人時有聯絡,偶然還會見到周星馳蹤影。縱使大隻雄額冇朝天骨,眼中亦冇靈光,但在星爺眼中,表面上平平無奇的他,好可能好似皇帝炒飯般高深莫測。「當時他正在籌備《食神》,可能覺得我幫到手啦!」

【星爺研究院】金槍人黃錦江文革被「下放」: 多謝香港冇拒絕我

【星爺研究院】黃錦江文革遭遇助星爺解難:本來牆上唔係忠黨愛國

+3
+2

其實大隻雄一直都是客串性質,未有全職投入演員工作。(葉志明 攝)

「第一日開工都仲有件背心」
徐志雄都有自知之明,明知自己無論身材、樣貌都並非一等一,所以從沒想過全身投入幕前工作,但既然有個機會客串又無所謂。其實劇本要拍甚麼?角色要演甚麼?細節統統都在星爺計算在內,只是問到片場工作人員就未必太清楚。「第一日去到片場問服指自己要換甚麼衫,對方根本不知會多一個人,在場人士立即詢問周生,他望完我一輪,便叫服指給我一件背心,下身穿回自己的牛仔褲便可。」這就是第一日開工的戲服,亦是爆星爺杯那幕戲服。

有趣係,去到高檔的頒獎禮上,大隻雄都會尊重場合,披番件老西,不過入面都係冇衫着,好謝霆鋒。(《食神》影片截圖)

這個造型只維持了一日戲份,後來再試第二場戲,星爺已索性叫他背心都不用穿。電影正值夏天時拍攝,赤膊上陣難得涼快,不過拍到後期天氣轉涼,大隻雄都擔心要繼續赤膊。幸好結局一場為迎合聖誕上映,佈景都改為充滿聖誕氣氛。「去到現場,見到身邊演員穿回外套及長袖衫,個心都定一定。」不過畀你估到,就唔係周星馳啦!當服指問周生今晚他要穿甚麼時,周生想了一會︰「加條頸巾啦!」「結果出來,我繼續冇衫着,就只有搭住件西裝褸加條頸巾,個身仍然是凍的!」這種對角色戲服的貫徹,為畫面帶來另一道反差,更是全片壓軸的爆笑畫面。 

拍攝當日天氣轉冷,改拍聖誕戲,星爺都算宅心仁厚,畀多條頸巾大隻雄,暖好多。(《食神》影片截圖)

問大隻雄可有嘗試操練成真正的大隻雄。「冇喇,自己身形咁,大隻咗都唔好睇。」(葉志明 攝)

【李兆基逝世】《食神》淺水灣奔跑惹人圍觀 田啟文︰佢冇理照跑

攞正牌爆一次星爺

第一次拍戲,徐志雄零經驗樣樣都在摸索階段,而埋位第一場戲就是「重頭戲」,星爺在廟街食霸王餐兼想呃湯藥費,被大隻雄一個膠杯爆落頭度。「那場戲大家都好緊張,第一,係隻杯用糖膠造,現場只預備了兩至三隻,如果兩take三take都不收貨便拍不成。」

冇杯拍都是其次,更重要是這場戲,要成隻杯打落周生頭處,雖則是糖膠,但都要有爆的效果。「埋位時我只好死撐,幸好最終拍了一兩take便收貨。周生頭上亦都有少少紅了。」為做到效果,周生當然冇罵他,不過拍完之後,其中一位工作人員,靜靜地走到大隻雄身邊,以羨慕的語氣跟他說︰「其實這一幕,很多人都想演。」徐志雄︰「這個我聽了便算,哈哈哈……」

+5
+4
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。