《那夜凌晨,我老公死極死唔去》李貞賢為救地球 謀殺外星親夫

撰文:許育民
出版:更新:

最近有睇《屍殺半島》,李貞賢飾演的媽媽角色應該令人印象難忘,型格得來又母愛大發,十分討好。2019年4月,李貞賢宣布和圈外男友結婚,以為往後專心做幸福少奶奶,但最近又會有新戲上,今次仲會飾演一個謀殺親夫角色。(上映日期︰11月5日)

老公行為古怪,令李貞賢處處懷疑。(《那夜凌晨,我老公死極死唔去》劇照)

在《屍殺半島》一面正經的李貞賢,來到新戲,一聽戲名就是笑片一齣,果然跟她的百變形象匹配。戲中她飾演的素熙,有位既溫柔又有錢的完美老公崔萬吉(金聖午飾),諗住日後就過住幸福快樂的生活。直至一日,素熙懷疑老公有外遇,於是請私家偵探調查,結果一查之下果然有驚人發現,老公原來唔係普通人,來自星星的他,一直企圖侵略地球,毀滅世界。為了保護地球,素熙決定大義滅親,找來好姐妹合力殺夫!

老公口渴,話要飲嘢。(《那夜凌晨,我老公死極死唔去》劇照)

不過嚟得侵略地球,都唔係等閒之輩,有「宇宙最強生物」之稱的他,完全係毒唔死、電唔瓜、劈唔傷,咁究竟點先令佢死得開心,走得安樂?到底一班師奶最終會如何決戰呢位外星人?

外星人有冇天生異稟?睇見幾位太太嘅表情,應該好震撼。(《那夜凌晨,我老公死極死唔去》劇照)

大家可能近年先認識李貞賢,不過佢啲歌其實你一直有聽過,事關當年鄭秀文Sammi對韓國跳舞歌情有獨鍾改編了不少,其中唱到街知巷聞的《煞科》及《獨家試唱》,就分別是改編李貞賢的《換掉》及《WA!》,其中唱《WA!》時配上的扇舞,更是一大亮點。

睇番呢個打歌造型,有冇少少印象。(網上圖片)