《阿索的故事》王菀之即場揸巴士接載演員 Bob︰驚到交低身後事

撰文:沈洛嘉
出版:更新:

由葉念琛執導,王菀之(Ivana)、林盛斌(Bob)、姜皓文、梁漢文、蔡潔主演新戲《阿索的故事》,扮演女車長的王菀之今日(3日)為了宣傳電影,再度着上制服打扮成巴士司機,即場揸巴士力證揸車技術!

主持講到Ivana頭先揸巴士掟彎好勁,Ivana即刻笑指:「唔好用個掟字啦!」(梁碧玲 攝)

今次Ivana着上車長制服,揸住雙層巴士環繞車廠,當中更有載住葉念琛、袁富華、姜皓文、阿Bob、蔡潔、陳欣妍、孫慧雪等人,問到Ivana剛才揸巴士緊唔緊張時,她坦言:「好緊張,但揸個陣唔覺,有師傅喺隔離提住我,多謝大家嘅勇氣同陪伴,冇諗過拍部戲有後路,因為有咗個巴士牌,今次的確係個好特別嘅經歷。」導演葉念琛就大爆阿Bob上車前同仔女老婆交代好一切,落車一刻同老婆講:「今晚可以返嚟食飯!」

有現場人士笑言Ivana喺巴士上都不停講:「唔好嘈我住,我仲有一個彎啊!」(梁碧玲 攝)

其實Ivana為了今次活動昨日(2日)特意到車廠補鐘,她笑言:「多謝導演同大家嘅信任,同時好興奮咁同大家講,我真係考到巴士牌㗎!其實已經年幾冇揸,尋日就有補鐘,我都冇擔心㗎,擔心嘅係大家。不過本身師傅唔俾我轉車廠入面個彎,佢話要高手先可以做到,但最後都係俾我轉埋,我真係做到。」黑哥就表示坐Ivana車一點都不緊張,早知道她訓練有素,Ivana則在旁連問了幾次︰「你真係唔緊張?」黑哥唯有答:「我好緊張!不過認真唔夠喉,想再坐耐啲,本身以為佢會揸出去㗎嘛!」

及後問到黑哥有冇諗過考多幾個牌時,他直言:「我有㗎!除咗有多個牌傍下身,好多戲又話要揸電單車,又話要揸貨車,下下話俾人聽唔得(好冇癮),嚟緊會考電單車先!而家啲電單車又大架穩陣好多。」

+4

另外Ivana講到一開始揸巴士最大挑戰係要提住自己唔可以交叉手揸呔,師傅一見到即刻話唔得!之後都好驚,因為驚考唔到就開唔到戲,最終考了兩次,雖然導演話無論我考幾多次佢都會等我,其實係因為考到先咁講,考到第4次可能佢已經拍咗第2部了。

最後Ivana講到睇完戲後,當中有一場黑過的戲令她十分感動,甚至喊埋出來,黑哥:「我同我老婆嗰場?唐詩詠做得好好,呢個老婆做得好好!一見到佢就已經(情緒)涌緊出嚟!」Ivana補充:「係嗰種張力好強勁。」

發表評論...