拆彈專家2｜內地流出劉青雲喪禮一秒爆喊　劉德華又要壯烈犧牲？

電影《拆彈專家2》將於今年聖誕檔上映，當《神奇女俠1984》都疑似會退戰到明年，今年聖誕檔大有機會得番《拆彈專家2》撐住。電影將會中港同步上映，電影的內地抖音帳號亦不時釋出最新片段，日前就流出劉青雲在喪禮爆喊場面，賣點是他一秒入戲，瞬間爆喊，但網民更有興趣知道到底青雲因乜而喊，唔通劉華繼上集後又要再度殉職？

影片中，只見劉青雲似是出席一場喪禮，鏡頭一直拍住青雲，起初畫面一切如常，直至青雲突然情緒到，一個轉臉便立即眼濕濕，情緒由0去到100，一秒間完成，不少網民都留言激讚。

除了好演技，另一引起網民關注是到底青雲於這幕，因何而如此激動，有鑑於上集劉德華為保住條海底隧道，結局寧願犧牲自己，壯烈殉職。不過有內地網民爆料，呢幕其實係講緊戲中與青雲相依為命的媽媽過身，青雲要按下移送到火葬場的按鈕，那刻淚如泉湧，非常痛心。