犯罪懸疑電影《私家偵探》，由鄭保瑞監製，李子俊及周汶儒聯合執導，古天樂、周秀娜、劉冠廷主演，故事由一宗令人費解的出軌案開始，竟牽扯出駭人的連環兇殺。早前，先導海報及預告正式公開，而近日在街上更見有貼滿《私家偵探》海報，不過最有趣是海報上提供一個電話號碼，記者嘗試致電發現真係聽到古天樂本尊把聲。（上映日期︰6月12日）

海報上有個電話號碼︰「5914 5301」，記者嘗試致電，接通後果然有古天樂本尊把聲︰「喂！我係國際偵探社，調查首席顧問歐陽偉業，我而家做緊嘢，暫時聽唔到你電話，如果你打嚟想搵我幫手，就留低聯絡方法，無論尋人捉姦，有貓狗搵唔到，你信我，我就盡查盡做，幫你搞掂佢，仲有一樣嘢，好重要呀，6月12日《私家偵探》上映喇，嚟戲院搵我！」記者有嘗試留低聯絡方法，暫未收到回覆，未知會否有驚喜？