《真三國無双》林雪被後宮佳麗嚇窒? 「真係頂唔順係一種折磨」

撰文:
最後更新日期:

由導演周顯揚執導兼監製,獲日本遊戲商「光榮特庫摩」(KOEI TECMO)正式授權之電影版《真‧三國無双》,定於本月29日在港上映。電影自推出劇照以來,一眾演員的造型都大獲好評,尤以林雪飾演的董卓最得人歡心,讚賞為神還原,不過神還原的背後其實非常辛苦,經歷炎夏外景及悶熱廠景拍攝的雪哥更形容係折磨。

首張董卓與義子呂布的合照,極具霸氣。(《真三國無双》劇照)

林雪︰「拍古裝辛唔辛苦?辛苦到X街呀!」

本身已極具份量的雪哥,要他炎炎夏日着古裝,仲要黐鬚、戴頭飾及披幾層戲服,未開機已經成頭汗。問到當初為何一口答應演「董卓」,他笑說:「我首先睇咗個造型,咦?呢個咪我囉,我先接咋,當然導演都係好有誠意,傾角色時真係做足準備。」

拍披甲上陣的打鬥場面,雪哥演繹得極威武,但其實他身穿的黃金戰衣相當重,又要拎住巨大的鋸齒刀策馬殺敵,少不免損手爛腳,幸好情況不嚴重,為免影響拍攝進度,受輕傷時亦只好忍:「你話拍古裝辛唔辛苦?講唔辛苦呃人啫,辛苦到X街添呀。喺新西蘭騎嗰啲馬係本身野外放牧,冇咁易馴服,一轉彎直情想將我成個人拋落地,扭親條腰,好在側邊有個當地馬伕扶住我,不過拍出嚟真係好好睇,辛苦都值得。」

同呂布爭貂蟬?「全部都係佢嘅」

董卓在《三國演義》中,最為人熟悉的情節,要數到跟義子戰神呂布(古天樂 飾)爭閉月美人「貂蟬」(娜扎 飾),雪哥笑說:「我同呂布爭女?佢邊有得同我爭呀?全部都係佢嘅。」

咁慷慨,原來雪哥在拍攝時,有一段難以磨滅的烙印。以往拍戲較少涉女色的林雪,這次因為飾演好色暴君「董卓」而艷福不淺,不過因為拍攝時正值暑假,天氣十分酷熱,拍外景固然熱到抽筋,開廠景又要顧及收音問題無冷氣,所以拍攝被幾位艷女大包圍的廠景戲份時,雪哥揚言真係頂唔順:「啲女着到『薄切切』,大家又出晒汗,人有體味,嘩!真係頂佢唔順!幾靚女都好,你話我開唔開心吖?我覺得係一種折磨,啲體味搞唔掂,你唔好見我咁肥咁輪盡,我人就唔挑剔,但味覺幾挑剔。」原來唔關後宮佳麗的樣貌事,而係體味,看來雪哥不比張達明幸福幾多。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。