《媽媽的神奇小子》吳君如為電影瘋狂謝票 「囂啲講句冇負評」
撰文：沈洛嘉
出版：更新：
由吳君如、梁仲恆（阿炳）、張繼聰、胡子彤、鍾雪瑩等人主演的熱血電影《媽媽的神奇小子》改編自殘奧金牌得主蘇樺偉的真人真事，今日（4/8）舉行首映，吳君如跟阿炳先接受傳媒訪問。
吳君如表示近日非常努力謝票。（梁碧玲 攝）
身兼監製及主演的吳君如，講到對電影正式上映感到非常開心：「自己籌備了3年，終於每粒螺絲都上穩了，自己睇咗5億3千次，今次睇IMAX又有另一體會。」阿炳都補充講到自己緊張：「因為未試過喺銀幕睇自己演出。」
吳君如揚言自己都開始轉崗位，接下來香港電影靠這班新人、新血。（梁碧玲 攝）
另外，君如都有特別感謝鵬哥盧海鵬。「好多謝鵬哥特登去到廣州，拍幾場戲，仲有阿炳哥（口誤）...」阿炳即時表示唔敢當，君如笑言叫晒所有人做哥。對於事前的宣傳，君如表示最近同阿炳、導演好勤力謝票，都有聽到唔少運動員喊足一杯水，有媽媽都喊到收唔到聲：「囂啲講句真係冇負評。」又揚言自己都開始轉崗位，接下來香港電影靠這班新人、新血。
吳君如感謝鵬哥千里迢迢去拍幾場戲。（梁碧玲 攝）
日前8月2日為君如56歲生日，她提到今年生日三代同堂，一齊切蛋糕、唱歌。「其實好簡單已經好快樂，囡囡彈結他進步咗好多，又學埋電結他，15歲反叛期係咁㗎。（阿炳有咩表示？）喺電話錫咗一啖喇，現實就千其咪喇。（生日願望？）希望套戲掂啦，零色情、零暴力，老少咸宜、一家大細都啱睇啊！」