《12日》鄧麗欣延續愛情輪迴 Stephy︰有一種好深刻難受感覺

撰文:許育民
出版:更新:

2000年,林愛華執導的《12夜》成為寫實的愛情經典,21年後林愛華再以編劇及導演角色拍攝《12日》,找來鄧麗欣(Stephy)及馬志威主演,以12日的相處,帶出由拍拖到結婚,十年時間兩個人感情及關係變化。電影《12日》更獲選為第18屆亞洲電影節開幕電影,得知消息後Stephy興奮表示:「好開心,因為今次是導演的另一延續,好有意思。自己剛為電影完成後期配音同睇完試片,好鍾意部戲,咁快就有好消息,希望可以接踵而來。」

Stephy拍完《12日》有所感受︰「《12日》帶出兩個人相處,有冇搵到一個舒服相處嘅方法、有無彼此妥協,明唔明白對方想要什麼。」(《12日》劇照)

《12日》今日率先發放電影節海報,男女主角在鬧市燈影下背對背,Stephy望著遠方若有所思、馬志威則手插褲袋、閉著眼,中間有「愛情輪迴」四字,透出戀人間的無奈。Stephy直言《12日》是導演以一段十年感情中的12日,作為時間性去表達男女主角的感情變化,拍的時候已經好有感覺:「《12日》帶出兩個人相處,有冇搵到一個舒服相處嘅方法、有無彼此妥協,明唔明白對方想要什麼?當中好幾場戲拍嘅時候同睇試片時,自己都有一種好深刻、難受感覺,相信有經歷過不同感情嘅朋友,無論男女都會有共鳴。」

Stephy再次飾演成熟角色,角色橫跨十年。(《12日》劇照)
鄧麗欣與馬志威延續舊版《12夜》,締造另一次愛情輪迴。(《12日》劇照)

至於首次憑主演電影入圍亞洲電影節的馬志威非常高興可以參與《12日》,因當年《12夜》都是隨伴成長,可以同林愛華導演、Stephy 合作更加榮幸。「第一次參與嘅電影入圍亞洲電影節,好開心,之前無諗過有機會參與到《12日》,角色需要橫跨十年對演員講係一個挑戰,同Stephy合作好有得著,導演嘅愛情觀則比較獨突,拍愛情片嘅觸覺亦唔一樣,有別一般港產愛情片。」而導演林愛華對《12日》未上映已有喜訊:「好久沒在香港拍戲,今次『回歸』,是拍《12夜》的新一章,真是最好不過,能做開幕電影,更是喜上加喜! 」第18屆香港亞洲電影節將會由10月27日至11月14日舉行。

+6