22世紀殺人網絡|劇組搵3次先肯出山 袁和平:根本無心裝載

撰文:沈洛嘉
出版:更新:

動作名導演「八爺」袁和平今日(28/10)在香港浸會大學舉行座談會,跟一眾電影系學生分享多年來的電影工作生涯。由荷里活男神奇洛李維斯主演的《22世紀殺人網絡 復活次元》即將於年底上映,八爺曾擔任《22世紀殺人網絡》的武術指導,會上他大方分享當年趣事。

外界傳聞奇洛李維斯拜了八爺為師,八爺笑言:「佢叫我master啫。」(網上圖片)

八爺率先講到:「當時唔聽對方電話,根本係無心裝載,而且自己都拍緊片,我都唔識英文,拍咩西片。第一次搵推咗佢再搵我,我又再推,直到第三次,對方搵邵氏黃家禧總經理搵我,佢話『人哋又出機票俾你,又俾酒店你住,點解唔試下?』最終雖然冇故仔睇,因為要去到荷里活先知,覺得功夫加荷里活特技令我眼前一亮,呢樣好新鮮先肯應承。」

談及當年拍攝最令八爺感到神奇的事,荷里活劇組開鏡竟然都會拜神,更備有燒豬及香,八爺心想着外國人竟然會相信要拜神。(陳順禎攝)

而當去到拍攝時,袁和平表示:「男女主角都唔(打)得,要訓練足4個,逢星期一至五,每日六至八小時,由基本功開始,點樣拉開條筋學起,因為肌肉太硬會起唔到腳。不過奇洛李維斯練武好努力,佢當時廿幾歲,真係打一拳都唔識,每場動作都設計好晒,教到佢識為止先拍。」

八爺指當時在澳洲拍了3至四個月時間,第2、3集採用back to back拍攝方式。(陳順禎攝)

八爺更有補充講到:「奇洛李維斯知自己唔得,要求星期六日都練,我心諗『唔好掛,我都要休息 』不過演員要求想好都要幫佢練,星期六日就唔會咁長時間,只係練一個上晝,佢OK㗎,係好肯學、苦學,痛到吖吖聲。」