【正義聯盟．有片】蝙蝠俠揸車要戴老花鏡 海王十號波去睇浪
撰文：劉健華
出版：更新：
今年除了數都數唔清的Marvel超級英雄電影輪流上畫，唯一對手DC在《神奇女俠》之後，還有一套終極晒冷作《正義聯盟》（Justice League）鐵定於11月上畫，雖然《蝙蝠俠對超人》已「順利」成為金草莓爛片，《正義聯盟》學投資者話齋，都係先抱觀望態度比較好。
《正義聯盟》的蝙蝠俠繼續是賓艾佛力，很奇怪他心口的蝙蝠為何一定要咁肥，是因為有錢吃得太多嗎？
蝙蝠車在《蝙蝠俠對超人》已經撞爛咗，今集他當然又會有新車。（影片截圖）
但似乎揸新車好考眼力，上車還要戴番副老花鏡。（影片截圖）
11月就做，《正義聯盟》的宣傳已經展開，幾個擔正的超級英雄蝙蝠俠、閃電俠和海王的宣傳短片剛剛出街，冇乜人識的海王是傳說中阿特蘭堤斯的英雄，擅長游水、潛水、浮潛等等，同埋鍾意十號風球去海邊睇浪，小朋友千祈唔好學；而蝙蝠俠賓艾佛力就一如既往好似嬲咗成村人咁，今集佢又有新蝙蝠車（有錢就是任性），但可能年紀大，揸車時要戴番副老花鏡，撞親神奇女俠就唔好；至於閃電俠就冇乜吐糟點，只係搞亂咗佢係Power Rangers嘅紅戰士……Go Go Power Rangers！
海王潛水是不用戴頭盔和氧氣罩的，拎住支叉周圍走方便燒雞翼。
十號風球仲去睇浪，小朋友千祈唔好學，如果唔係好似呢位叔叔咁俾浪沖走。（影片截圖）
閃電俠呢身好科幻嘅盔甲聽講係蝙蝠俠打造，衣着品味似乎有點問題。