【香港電影我撐場】低成本谷創意 陳志發：想拍中國人上火星做假
杜汶澤的《低俗喜劇》當年以三百萬成本，意外地斬獲三千萬票房；而《點五步》獲監製柯星沛襄助的陳志發，以二百萬緊絀開支完成拍攝，最終拿下近六百萬票房，兩部電影都是刀仔鋸大樹的罕見例子，但要限米煮限飯，陳志發說：「冇錢有制限就會逼到創意出來，但好痛苦。」至於杜汶澤則直言無辦法，因若果在電影質數及創作自由中二選一，他寧願選擇後者。
《點五步》獲得商經局的「首部劇情片計劃」資助二百萬，陳志發一度以為夠用，「起初覺得200萬好多，我畢業作都是拍了6萬元，都有40分鐘，90分鐘都十幾萬左右啦，殊不知一做落不是人咁品。」然而艱苦我奮進「冇錢就用冇錢的方法去做，但冇錢有制限就會逼到創意出來，但好痛苦」，最後超額完成，不得不歸功監製柯星沛。
杜汶澤續說，「正如他的監製所說，如果有600萬又未必咁拍，可能很大機會仲差。」上一部監製兼演作品《選老頂》，杜汶澤都面對資金緊絀的情況，該片到意大利參加烏甸尼影展，首映後有觀眾問他，片末血腥畫面很粗糙是刻意還有其他原因，杜說：「我好感激他以為我想是專登，當然如果夠錢最好，但冇得揀。你問我，想夠錢做那些血但成套戲不夠錢拍，還是成部戲拍到出來但有少少缺撼。我都想做一套質素差少少，但精神比較自由些的電影。」
本土電影限米煮限飯，電影人扭盡六壬谷創意，但有時未必是質數差，而是因為題材故事欠叫座力，相信很多人都聽過，港產片「留喺屋企睇都得」，加上像Netflix、myTV SUPER等網上OTT平台日增，新科技慢慢改變港人觀影習慣，杜汶澤直認劇情片比較適合留在家中睇，但就說：「電影還頂得住，因為電影有90分鐘，你拎住塊（平板電腦）90分鐘都非常痛苦，雖然我老婆會這樣看10幾集韓劇，但不是個個人這麼強橫。所以荷李活就聰明，現在拍都是聲效、特技為主，都出於對抗細mon。」
講起荷李活特技聲效，就會想超級英雄等科幻片，最近古天樂電影公司籌備已久的《明日戰記》正式開拍，陳志發表示其實自己也有興趣製作科幻片，「我都想在有生之年將自己的畢業作拍成電影，但入面題材非常敏感。」杜汶澤問：「有幾敏感？」陳志發則說︰「中國太空人登陸火星其實是造假。」但杜汶澤笑言，「呢個好可能有一日是紀錄片喎。」