韋家輝籌備《神探大戰》下集 青雲Sammi可拍《我右眼見到神》
撰文：朱奕錦
出版：更新：
韋家輝自編自導的電影《神探大戰》於第41屆香港電影金像獎連奪最佳導演、最佳編劇、最佳男主角以及最佳攝影四個大獎，他在出席慶功宴時大歎開心：「我覺得今日好奇妙，最開心就係青雲攞到男主角，Sammi攞到女主角，因為青雲同Sammi都是我最鍾意的男女演員，兩位都是我合作最多的演員，佢哋攞到我非常之開心。」
韋家輝好開心自己以及最鍾意的男女演員攞影帝影后。（梁碧玲攝）
提到會否想在與兩位再合作，韋家輝笑言：「好多年前拍過《我左眼見到鬼》，再拍可能《我右眼見到神》。」他續指道：「其實我有時諗下好想將左眼見到鬼調轉來講，因為左眼見到鬼係個女仔角度見到老公，我成日諗如果喺老公角度，拍返轉頭會點？但等我慢慢寫先。」
韋家輝笑言可開拍《我左眼見到鬼》續集，《我右眼見到神》。（《我左眼見到鬼》劇照）
對於下一步計劃，韋家輝透露：「因為我好少開續集，但我拍完《神探大戰》發覺裏面有一些人物未講得太清楚，再挖落去好深，譬如林峯點解會咁樣，或者青雲佢真實是點樣，所以我而家搞緊兩個劇本，一個劇本就係《神探大戰》的第二集，另一個就係黑社會題材，講緊90年代香港黑社會。（搵邊個做？）其實都幾想青雲可以做，但我未同佢傾，因為我未諗好晒個劇本同所有人，咁我會搵青雲傾。」
韋家輝透露有兩個劇本正在籌備。（梁碧玲攝）