金手指｜周潤發探班「賭神刀仔」合照　仲有五虎將其中一員現身

電影《金手指》正在上畫，不少幕後花絮片段都陸續公開，當中包括發哥周潤發拉大隊驚喜探班。片中所見，發哥似跟大家跑完步後，聯同盧海鵬等人去到片場探班，同大家影大合照，而在片中更見到「五虎將」的另一成員到來。

周潤發加劉德華，自然令人想起經典電影《賭神》入面與刀仔這對拍檔，而合照時，發哥見華仔太禮讓企到最後，於是叫華仔企高啲，務求影到所有人齊齊正正靚靚仔仔。而最驚喜是影片中，原來有黃日華一齊，令現場一時間雲集了劉德華、梁朝偉、黃日華「五虎將」的三位成員，相當難得。