跟住GOT7遊香港！　《You Are》MV取景地遠到去西貢四疊潭

想跟住韓星朝聖嘅粉絲，今次唔使去咁遠喇！因為GOT7最近嚟咗香港，為第7張迷你專輯《7 for 7》主打歌《You Are》拍MV，昨晚GOT7公開了兩段預告，當中就見到GOT7走篇港九新界拍攝，唔單止有經典嘅海旁夜景、霓虹燈街景，連行山客熱愛嘅石澗美景都拍埋，成件事真係好香港！以下呢五個GOT7 MV拍攝地，身為香港人嘅大家又去過未呢？

（觀看更多）

【GOT7香港見面會】挑戰陳奕迅《浮誇》　Jackson自嘲得1米74

　　　　　　1. 樂華南邨停車場天台　　　　　　

昨晚公開嘅預告入面，開場就見到一列綠色的水泥牆建築，圈中有圈超有空間感！其實呢度係牛頭角樂華南邨停車場天台，唔少攝影愛好者都好鍾意去取景，不過如果大家去到睇實境的話，牆身顏色並不像GOT7 MV入面的薄荷綠，而是淡淡的藍色。

　　　　　　　2. 勵德邨圓形大廈　　　　　　　

呢個場景大家應該見過！《You Are》預告片段中有謙拎住頸鍊碎片，站在圓筒形建築物向上望，有啲迷幻又有啲壓迫嘅感覺，呢度就係灣仔大坑嘅勵德邨，圓柱體大廈嘅建築喺香港好少見，勵德邨亦係香港唯一圓筒形廉租屋大廈，好多廣告、劇集都喺度取過景，連電影《攻殼機動隊》都去過拍攝！

　　　　　　　3. 尖沙咀文化中心　　　　　　　

BamBam呢一幕唔使多講，尖沙咀文化中心大家一定認得，當日GOT 7去呢度拍攝嘅時候，就已經有一班粉絲成功「捕獲」偶像，成員們又去到尖沙咀海旁取景，MV預告入面就有唔少維港夜景嘅鏡頭！

　　　　　　　　4. 西貢四疊潭　　　　　　　　

《You Are》預告入面仲有呢一幕嘅跳潭片段，雖然片段入面睇唔清楚，但從紅色髮色估計可能係Mark，係真身又好替身又好啦，從十米高嘅懸崖跳潭望落真係有啲牙煙！而呢度就係西貢四疊潭，平時都有唔少市民嚟到消暑，不過其實近年以來四疊潭發生過唔少跳水意外，都有人因為跳潭而遇溺身亡，潭邊其實仲立有「請勿戲水」嘅告示牌，如果粉絲想去朝聖，記住淨係欣賞靚景就好，唔好冒險跳水呀！

　　　　　　5. 佐敦白加士街　　　　　　　

香港嘅霓虹燈一向都係遊客影相嘅checkpoint，Mark同BamBam喺《You Are》MV中就好有型咁肩並肩走過佐敦白加士街，望到兩旁嘅店舖名，大家係咪都好有親切感呢！

更多《You Are》MV圖片：

（觀看更多）

【韓講堂】跟少女時代、TWICE、GOT7一起吃飯吧 記者韓國親身試

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/