手機App叫外賣卻無數次拖延 等足3個鐘冇回音 想投訴退款卻無門
最近有網民抱怨透過手機App Foodpanda預訂外賣，下單後等候近3小時仍未有送達，期間手機App內顯示時間更不斷拖延，最終想投訴並申請退款，客服則僅建議耐心等候，並拒絕退款，讓網民大感無奈！
手機App叫外賣卻無數次拖延 等足3個鐘冇回音 想投訴退款卻無門
有網民於Facebook群組「中伏飲食報料區」發帖抱怨，指日前使用手機App Foodpanda預訂外賣後，等候近3小時仍未見蹤影。
事主表示當日於12時40分下單，成功下單後相關頁面限時外賣將於2時30分抵達，隨著時間逼近，該頁面不斷更改時間，更改至2時45分、2時55分、3時15分、3時36分等，等候近3小時仍未有回音。
事主又稱，自己已就事件三度聯絡客服，惟客服僅建議耐心等候，拒絕退錢，讓事主大呼好恐怖。事主表示：「Lunch Hour又過晒，4個order無嚟。送到嚟都臭啦！就放工喇，洗唔洗放喺門口，我哋4個人聽日Lunch返嚟食？」
有網民稱：「已經放棄咗Foodpanda好耐，佢根本就唔夠人手送，又唔cut單！打去餐廳問，餐廳話啲嘢食放咗喺度半個鐘都冇車手來接，10次叫10次都係遲，好彩遲半個鐘，唔好彩遲個幾鐘兩個鐘」、「樓主好慘，我通常係自動被取消訂單及回水，不過等咗成個鐘先話唔嚟都好煩，但你個case仲無奈」。
亦有網民稱近日天氣能夠體諒情況：「所以通常大雨我都唔會叫，啲嘢送到嚟都濕粒粒唔會想食」，更有網民分享經歷，稱：「我剛剛見住個單車手因為落雨，個袋穿咗，幾個餐落曬地」，樓主則表示問題不在車手身上，而是在於公司處理相關事宜不當：「唔緊要，我唔怪你，但無理由唔退錢」。
《好食玩飛》記者就事件向Foodpanda查詢，Foodpanda就事件回應：「感謝你的查詢，foodpanda香港亦注意到相關個案。當日因天雨關係，我們的送遞服務暫時受到限制，因而令部份訂單出現延遲。就你所提及的個案，經線上客服即時處理後，我們仍繼續為該名顧客作出跟進，並於稍後時間全數退還訂單款項，以及再次就顧客造成不便致歉。我們亦正研究改善送遞流程的方案，盡力避免上述情況再次發生。foodpanda香港會繼續虛心聆聽顧客意見，不斷提升服務水平，致力為顧客提供更佳的訂購體驗。」