巴黎平民米芝蓮 三道菜晚餐僅300港元

撰文:
最後更新日期:
這是被 local 法國人譽為最巴黎最平民的米芝蓮餐廳。是日晚餐是 Comte cream asparagus with sliced chorizo,還有非常美味的 hake fish,甜品是 chocolate fondue,每位 35 歐至 55 歐(約港幣302元至475元)不等……飛嚟飛去咁多年,次次咩調查咩報告都話 London 同 Geneva 係全球生活物價指數最高的地方,總會覺得,指數都係假既,自己真金白銀攞出嚟嘅生活指數,先係真嘅…當香港嘅仲貴過巴黎嘅時候,究竟代表d咩。
胡頁一

喺巴黎,有氣氛、好食、有特式嘅小店不少,而且,可能比在香港更抵食。(博評組資料圖片)

去了一趟法國。

原因是機票真的很便宜。 巴黎恐怖攻擊之後訂的,亞洲出發,round trip,才 4000 港幣。

一到達,法航就把我們的行李丟掉。當時身上穿的是坐十幾個鐘頭機的睡衣,同一支潤唇。法航每人賠左 200 歐元,法國朋友話,如果喺 counter 前拗數賴死唔走,應該可以賠多啲。

選擇了 Madeleine 附近的 boutique hotel,一如巴黎其他酒店,架電梯同間房都好細,但好靚。法國人是撞色的天才,法國男人會穿紅色褲加綠色襪加淺咖色鞋;好多酒店主打 minimalism,咩都全白,冇心思,冇料到,撞色當中的衝突以及和諧感,有趣。Classic single room 300幾歐一晚,自己去玩算肉赤,但想到朋友暑假帶兩個豆丁去馬來西亞 LEGO Land,酒店都 3000 幾蚊晚,又覺得抵番。

每天去的餐廳都是法國朋友選的,所以基本上,都好得。

花 28 歐就可在米芝蓮 L’Epi Dupin 食個lunch,中環、灣仔食個 lunch 都可能唔止。(照片來自餐廳網頁)

自己對太華麗太宮廷式又有點過譽的米芝蓮餐廳沒有很大興趣,朋友帶路去了一間在 Ferrandi Paris 廚藝學校附近,有點太平近易人的門面,還看不出來是星級餐廳。我們到的時候才 5 點多,一個胖胖笑笑的法國男人抱著一大個明顯放著大堆食物的雞皮紙袋,跟我的朋友聊了起來。

好熟?我問法國朋友。

唔識。法國朋友回答。

那位胖胖先生走進廚房換好了廚師服,我才發現是主廚。失敬。這是被 local 法國人譽為最巴黎最平民的米芝蓮餐廳。

是日晚餐是 Comte cream asparagus with sliced chorizo,還有非常美味的 hake fish,甜品是 chocolate fondue,朋友點的羊肉和燉磨菇更是出色。每位 35 歐至 55 歐不等,午餐 set lunch 只要28歐元。餐廳的名字是 L’Epi Dupin。

趕時間的話,對面有同一個老闆開的 Deli,一份米芝蓮級 hot meal take out,三歐元。

飛嚟飛去咁多年,次次咩調查咩報告都話 London 同 Geneva 係全球生活物價指數最高的地方,總會覺得,指數都係假既,自己真金白銀攞出嚟嘅生活指數,先係真嘅。

以為燒味飯必是平民美食?睇下你響邊度食囉。(黃永俊攝)

有一次在歐洲工作,中途經香港轉機,忽然好想食叉燒飯,但一蚊港幣都冇。

大家樂阿姐話,咁你有冇八達通丫?

有,但裡面冇錢。Euro 收唔收?

阿姐話係錢就收。

我拎咗 5 歐元出嚟。

阿姐話:唔夠喎。

原來一個叉燒飯要 70 蚊。嗰刻覺得香港朋友成日笑我係加燦,原來係啱嘅。

我未叻到 30 幾歲就可以喺加拿大退休,朋友講既加燦,泛指同香港生活脫節以及同香港物價格格不入的人。

喺上環地鐵站旁邊既豆腐膶 coffee shop,一杯企喺度飲既咖啡要49 蚊港幣…. 巴黎2.5歐咋喎,仲好大杯。

香港停車場七八十蚊一個鐘,美國 Portland down town 夠泊一日。

住喺天后一間三星嘅 serviced apartment,如果身高 180cm 嘅人,對腳會喺床外面,衣櫃喺爛嘅,900 蚊一晚;我不禁諗起 West Berlin 嗰間 50 euro一晚嘅 chain hotel,間房真係太新太大太靚。

有d sad 咁行咗去 City Super,雪藏長腳蟹,八隻腳,1500蚊港幣;喺北海道 2500 yen all you can eat。

(照片來源:Les Oreilles et La Queue 面書專頁)

如果說去旅行是逃離香港的瘋狂不合理物價,咁樣太悲觀,睇下地產版列出嚟嘅樓價,同諗下特首成日話嘅土地問題,可能更明白香港物價是由什麼組成的。不是要求超平或物超所價,但點解要俾 60 蚊喺茶餐廳食一個凍嘅螢光咖喱飯呢。

在巴黎的最後一日,香港朋友嚟咗,晚餐我發板,去咗AP巴黎 office 附近嘅 steak house,驚喜過晒阿根廷同美國佬嘅牛,grill 得啱啱好,waitress 仲難得一見咁對 non-French speaker 非常友善,拆咗牆上個牛隻部位圖落嚟,協助說明同落單。連 appetizer 同甜品同咖啡,落樓唔駛四百蚊港幣。

飯後上咗香港朋友聲稱好得嘅屋坐下,巴黎鐵塔隔離,1500呎,airbnb 訂,1000蚊港幣。住一個月做嘢啱晒。

(博評組資料圖片)

當香港嘅仲貴過巴黎嘅時候,究竟代表d咩。

係我地香港與時並進,終於擺脫亞洲國際都會,擠身正式國際都會?真心覺得香港係物價同質素最唔成正比嘅地方,over priced。物價排名唔係一個城市嘅身份象徵;物有所值,先係一種競爭力。

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。