【最緊要好玩.博評】TVB幕後人員:守舊高層處處操控,玩死節目

撰文:方以文
出版:更新:
佢哋(舊派)嘅諗法係只需照顧嗰班固有觀眾群,完全放棄新一代觀眾嘅需要。得罪講句,電視業係畀佢哋搞死嘅。
報料人

2017年到依家過咗九個月,要數最難睇嘅本地製作電視節目,一定有無綫《最緊要好玩》份,仲係三強。一班演員全力以赴去演繹一啲無二十年都有十年歷史嘅「笑料」,傷害觀眾嘅眼球同大腦。

搞笑節目難度最高

做搞笑節目從來都係高難度動作,因為要食腦。想觀眾睇完識得笑,要貼住時代脈搏,仲要把握到大部份觀眾嘅感覺,先至會成功。呢樣嘢真係唔係個個都夠擔挑戰,《最緊要好玩》就係失敗之作。睇牌面,有舞台劇界鄧智堅拉埋一班演藝學院嘅師弟妹,再加埋一班無綫演員做主力。以鄧智堅喺舞台劇嘅表現嚟講,喺今次節目所表現出嚟嘅質素明顯有落差。到底出咗咩事大家都係得個估字。直到我收到來自一位有份製作呢個節目嘅人嘅PM。原來一切都係守舊嘅節目高層出事。

高層指令抄舊嘢

如果你「咁好彩」有睇呢個節目,你一定會覺得好大陣《歡樂今宵》味,原因係製作呢個節目嘅高層都係EYT出身。戴個頭盔先,唔係話EYT出身就一定係因循守舊,但依照報料者所講,佢哋十分為自己出身於EYT而驕傲,亦都繼續擁抱緊呢個曾經風光一時嘅節目。明目張膽咁話要抄舊嘢,仲要講明愈舊愈好。報料人話最離譜嘅一次,就係有人提議拎粵語長片嘅一段歌重拍!最後出到嚟,演員就以粵語片中人經典人物造型拍咗首《姑娘十八似花嬌》,即係呂奇哥哥同寶珠姐唱「遙望青山綠水美如畫」嗰首。問你怕未?報料人話絕望時寧願佢哋抄網上嘅笑話就算,但好可惜佢哋唔識笑。

另一個睇到我頭都痕嘅位,就係啲演員用嗰種擠眉弄眼誇張表情聲線嘅「傳統」喜劇表現手法。原來又係高層指定要咁做。你見幾位來自演藝學院嘅演員扮小學生喺度朗誦,真係好似時光倒流三十年咁,我為佢哋感到尷尬又無奈。

死亡之吻 避得就避

節目嘅橋段同埋演出方法都向徹底潰爛嘅方向發展,幕前演員首當其衝,行先死先。有打滾江湖多年嘅演員本來答應咗拍三段故事,到拍之前收到劇本先知爛到不能接受,最後想推,但都要拍兩段先甩到身。

另外,有隊男子組合自告奮勇報名,想參與呢個節目惡搞自己嘅歌。不過就唔到呢個組合自己話事,改編歌詞全權由大台負責,到佢哋收到改編歌詞時,就因為太過低俗又唔好笑,同佢哋期望嘅效果相差太遠,所以退出咗。

你見幾位來自演藝學院嘅演員扮小學生喺度朗誦,真係好似時光倒流三十年咁,我為佢哋感到尷尬又無奈。(《最緊要好玩》Youtube截圖)
+2

守舊為守住地盤?

大台近年唔少節目製作都有「復古」現象,今次《最緊要好玩》係個極端例子。報料人對呢個現象都有睇法,佢覺得關余詠珊入主嘅事。

自從余詠珊入主非戲劇分部之後,舊派被壓榨萎縮緊,但就未被根除。呢班舊派對抗余詠珊嘅最大依據就係收視,為咗保住收視,佢哋會將節目嘅細節愈收愈緊。
報料人

結果舊派就用自己認為最成功而又最十拿九穩嘅招數去製作節目,《最緊要好玩》就複製《歡樂今宵》。呢個節目最初放喺周六夜晚2230 - 2300播,喺呢個收視死位有雙位數字收視,令到呢個「複製EYT」方法一直影響住個節目,亦都由2017年2月開始一路折磨一班年輕啲嘅觀眾。終於喺最後五集,搬咗去周一至五2230播,先至真正挑起大眾反響。不過每個節目都有佢嘅命,五集話咁快就過咗,守舊嘅節目製作高層可以撇除呢五集,以其他集數嘅成績繼續證明自己複製舊節目呢個方法係行得通嘅。

報料人話自己做呢個節目做到灰。「佢哋(舊派)嘅諗法係只需照顧嗰班固有觀眾群,完全放棄新一代觀眾嘅需要。得罪講句,電視業係畀佢哋搞死嘅。」

唉,我聽到都覺得好灰呀,唔通要等到呢班人退晒休先有得救?

大台近年唔少節目製作都有「復古」現象,今次《最緊要好玩》係個極端例子。(《最緊要好玩》Youtube截圖)
(文章純屬作者意見,不代表香港01立場。)