先旨聲明，呢篇文其實唔係講足球，係講價值，同埋思考方式。提到轉會費等等只係約數，有時事後會調高調低，唔同傳媒報會報唔同數，又有匯率問題之類，有挑骨頭癖嘅可以慳返先。

暑假球壇靜得很，近日最多人關心嘅，當然係巴西首席球星尼馬（Neymar）嘅世紀轉會——轉得成嘅話。法甲土豪球會巴黎聖日耳門（PSG）打算用20億港紙向西甲班霸巴塞隆拿收購尼馬。上星期傳好多人都仲以為老作，20億喎，點知真係有人肯比。果然有錢就是任性。

20億港紙咩槪念？轉得成，就破晒轉會費紀錄，仲要係高出成條街。原本紀錄保持者係英超曼聯嘅法國中場普巴（Pogba），舊年由意甲祖雲達斯加盟，都未使10億港紙，半個尼馬未夠。

呢張圖在twitter好多人轉。20年前，左邊嘅仁兄係史上最貴足球員。今日，右邊嗰位細路身價係佢10倍。唔多睇波嘅都可能認得，左邊嘅係上一代巴西球王朗拿度（Ronaldo），20年前佢由西甲巴塞去意甲國際米蘭，破紀錄嘅轉會費，盛惠2億港紙。20年後，右邊呢位小朋友尼馬值20億，差不多10倍。

尼馬好唔好波？咁梗係好波。佢好波啲定朗拿度好波啲？有得拗。但尼馬會唔會係朗拿度10倍咁好波？咁當然唔會。咁即係，尼馬個身價好大泡沫？又未必。大家最關心嘅問題，20億值唔值？係咪有人做土豪做水魚？

第一種估值方法，係同其他嘢比，起到幾多條高鐵？買到幾多個魚柳包？2億同20億，對我等窮人嚟講，都係冇乜槪念。你見有啲懶嘅記者話你知20億可以買幾多個凱旋門單位。但其實買到10個同20個，對我嚟講都係冇乜分別，都係冇份，讀者都係唔明。10個單位好貴，20個單位咪好L貴，so？

第二種方法，就係同其他球員比，小明都值兩百我冇理由唔值三百。咁既然普巴都唔使10億，尼馬值20億好似都OK，然後數下拎過乜獎捧過乜盃入過幾多波，讀者已瞓著。10億男普巴冇世界盃冇歐國盃冇歐聯冠軍添，又如何？

貴嘅嘢，罕有嘅嘢，向來海鮮價，難估值。梵高嘅一幅真蹟，真係傳到心嘅寵物傳心師，或者壽司之神小野二郎親自招呼你，有今生冇來世，值幾錢任你講。尼馬未必有美斯C朗咁好波，但話係全世界80億人中踼波最叻嘅10個之一，應該冇乜人有異議。

於是乎，去到第三種估值，就係「有人畀就合理」。聽落好似幾簡單，所有嘢都好合理，20億合理200億都合理，照計信自由市場嘅本人應該幾受落。但諗真啲，又唔係喎。真係有人畀就「合理」？如果真係咁，唔會咁多人笑中超球會做土豪天價買二三流球員啦。更何況今次買尼馬嘅係PSG，背後係中東卡塔爾油元，真係「公平價」？價值未必有好絶對嘅標準，但唔係絶對冇標準。你聽日肯1蚊賣股騰訊畀我嘅，我瞓身家同你買。廿年前西甲球會貝迪斯2億買「花王」丹尼臣（Denílson），畀人笑水魚笑到今日，而年青嘅球迷根本唔知乜水丹尼臣。

試下科學少少。文章初段提過，同係破紀錄，同樣係巴西球王，尼馬身價係朗拿度10倍。係咪10倍咁好波？一定唔係。心水清嘅你都知原因一個字：通脹。廿年前呀大佬，麥當勞幾錢雲吞麵幾錢？

醒目少少嘅，會知道因為通脹，所以轉會費成日都破紀錄。維基百科有計經通脹調整後，最貴嘅球員，正係萬人迷C朗拿度。2009年嘅8000萬英鎊，真天價，但唔會有人話唔值。

但又再醒多少少嘅，都大約會再問。尼馬身價係朗拿度10倍，但20年間，通脹有冇10倍呀？答案係冇，大約一個開左右啦。咁即係「跟通脹」，尼馬身價應該係朗拿度一個開啫——如果一樣咁好波的話。定你話我知尼馬係朗拿度5倍咁好波？

開估，呢個就係好多人，包括維基百科呢個表嘅盲點。首先，我唔知佢用邊度嘅通脹，買家？賣家？球員祖國？。我亦唔知個通脹點計出嚟，照計應該係用消費物價指數CPI之類當係「通脹」。過去幾十年，麥當勞貴咗幾多？太古城貴咗幾多？絶對升得多過「通脹」。咁點解你覺得球員身價會係跟「通脹」？

更好嘅方法，就係物化球員。利物浦球迷兼作家Paul Tomkins自己整咗個「球員指數」。原理唔算深，就係當球員係一件件貨，每單轉會紀錄低，好似麥當勞加價咁次次次計住，咁點都合理過用咩「通脹」。佢計過，用佢嘅指數調整後，普巴根本一啲都唔貴，甚至唔入10大。 史上英超（Paul冇包括其他聯賽）最貴收購，其實係10年前車路士買烏克蘭「核彈頭」舒夫真高（Shevchenko），等同而家1.4億英鎊——不過都未有尼馬咁貴。

Paul嘅指數解釋咗結果，但冇解原因。都係嗰句，10年間，同係巴西球王，尼馬身價係朗拿度10倍，仲唔係泡沫？答案，不一定。點解？頭先講過，邊個話球員身價價跟「通脹」？較為合理地，不妨諗下，而家嘅球會搵幾錢，20年前又如何？

唔想做維園阿伯，想討論球會財政有返些少理據嘅，必定要睇Deloitte（對，德勤會計師樓）每年出嘅Football Money League（FML），講歐洲球會一年幾多收入（留意唔係利潤）。編寫用心又易明，最重要係免費，你都唔去睇就冇人幫到你。

根據FML，20年之間，歐洲頂級球會（收入最高嘅20間）嘅收入，由一年8億幾英鎊升到近55億，差不多7倍。謎底解開了，既然球會收入都升7倍， 個別球會仲要唔止，咁，巴西球王身價升10倍，好過份咩？

（至於點解球會收入可以升咁多就另一個課題，不外乎係因為全球化，廣播技術，多咗人去旅行睇波，仲有亞洲特別係中國嘅中產堀起）

明咗呢個道理，舉一反三，就明白呢個世界點運作。點解美孚新村太古城升咗N倍遠遠跑贏通脹？而家買樓嘅同當年買嘅根本唔係同一類人（甚至唔係同一地方嘅人）。你睇咩負擔比率香港樓市一早已經爆咗幾次煲添，但世界唔係咁運作，香港買樓供樓嘅唔係咩中位數收入嘅人。

同樣地，騰訊（700）13年前4蚊上市，而家300蚊，仲要試過1拆5，即係升咗400倍咁滯，仲唔係泡沫？「同一間公司之嘛！」。咁你又不妨望下當年人哋賺幾錢，而家又賺幾錢。

一樣，港交所（388）上市都未夠20年，當年3個8毫8，而家兩舊幾三舊水，仲派咗N次息，仲唔係泡沫？你話呢？當年一日幾多成交？而家呢？

所以，結論，尼馬都真係好貴，但冇你想像中咁貴。

（本文純屬作者意見，不代表香港01立場。）