終於捱完四個月無紅日的漫長日子，打工仔喺十月有假放了！讀書時期最期待放暑假，出嚟做嘢之後最怕暑假，無紅日之餘，迫地鐵迫巴士一大陣咸魚味，仲要又打風又紅雨黑雨，返工返得勁狼狽，仲帶嚟無盡嘅塞車煎熬……過去幾個月想抖抖，除咗年假只有Sick Leave，年假無咩好講啦，Sick Leave卻是一個大罪名！人人都唔想病但人人都會病，人人都會病但唔係人人都敢請病假，喺香港做打工仔，無論你係病住返工定病咗請假，總之病就會比人怨！

病到幾嚴重先可以理直氣壯請病假？

感冒發燒雖然係小病，但如果唔請日病假去睇醫生，拖太耐有可能引致其他併發症變大病，而且照返工又會將病菌傳染其他同事，由一個人病變成一Team人病，由「有責任心」變成「無公德心」。比你你會點揀？

Jennifer性格外向，喺公司日日都好多嘢講，突然有一日好殘好眼瞓咁返工，佢話覺得自己有啲感冒同發燒，跟緊個Project有嘢趕住交，所以食粒退燒藥就照返工。同事聞言即刻彈開成呎遠，仲提佢出Reception拎口罩。結果Jennifer全日迷迷糊糊咁，其實都做唔到幾多工作，仲令坐佢附近嘅同事提心吊膽，勸佢早走／第二日唔好返，去睇醫生……

第二日，Jennifer真係請咗病假，仲喺訊息度話自己入咗醫院，入院咁嚴重，同事們當然體諒，就將Jennifer嘅工作分咗嚟做。點知當晚，又收到Jennifer訊息，話仲未退燒未出得院，而且醫院報告未出，第三日都要請病假，當中，一個心地唔好嘅上司就開始跳制，喺Group Chat覆話要Jennifer一收到報告立即交代病情，重點係連Take Care都無一句。

結果，Jennifer驗到患上肺炎，需要請一星期病假。上司同部份同事就產生了不知哪裡來的怨氣，日日話：

做多咗嘢，人工係咪可以加呀？

甚至質疑Jennifer嘅病情：

好地地又會肺炎？明明發燒之前嗰日都仲好精神。

呢個世界一有利益衝突就會展現人性，無人關心過Jennifer病成點，只係想知手上嘅工作幾時可以甩返出嚟。

病住返工，就比人嫌你散播細菌；請病假，就比人質疑你作大病情。打工仔，點做好？

病一病，才發現Deadline可以唔Dead

你病咗，同事一邊怨你一邊幫你完成本身「屬於你」嘅工作，其實咁樣已經好好運，因為更灰嘅係，明知你病，其他人都由得啲工作堆喺度唔理，即使件事係Urgent，大家都隻眼開隻眼閉，唔提唔講當唔記得，等你病完返去先扮啱啱醒起：

啊！Project A你係咪Send咗比個客喇？好似係尋日Deadline喎。

當然呢句係廢話，病咗兩日嘅你一定係Meet唔到Deadline，然後阿同事又會話：

吓，咁一陣開會你記得同老闆Report返。

Report？Report啲乜嘢？你只係醒覺，平時趕生趕死，飯都唔食咁留喺公司趕Deadline真係好傻，因為你而家先至明白，原來Deadline過咗交唔到都真係唔會Dead，而唔食飯、有病唔休息同工作太大壓力先真正會令人Dead。

從此之後，你學識多咗一個職場道理：良心同責任心係要有，但凡事有底線，真係無必要為咗份工去到「捱生捱死」的地步。請謹記：工作只係生活其中一部份，工作以外的生活才是真正自主的生活呀！

（文章純屬作者意見，不代表香港01立場。）