轉載《日本別府「化糞池溫泉」，你敢唔敢浸？》

別府市內好多溫泉，但全部都唔係大家心目中靚靚嘅露天溫泉，要露天溫泉，就入住貴貴嘅溫泉酒店入先有，大部份市內溫泉都好似下面張圖咁，似個巨型化糞池。

黎到別府，有幾樣嘢係顛覆咗我認知嘅。

1.「地獄」唔係好辣咁解

香港有間專賣「別府地嶽拉麵」嘅連鎖餐廳，令大家以為別府拉麵好出名，對唔治，原來一直都係香港騎劫咗「地獄」兩個字。「別府地獄」係講別府市入面，8個唔同溫泉口組成嘅旅遊區，同八大溫泉「別府八湯」嘅別稱。日本好多時都叫火山口做地獄，因為長年噴煙加周邊土地無養份，以致寸草不生，啲泥又重硫黃同鐵變得又紅又綠，成個地獄咁款。（北海道登別都有個火口地獄谷。）

香港就一聲唔該拎咗「地獄」兩個字做特辣拉麵，但呢邊其實係

一。間。地。獄。拉。麵。都。無。

而且別府拉麵係唔出名的，拉麵店又少，甚至無辣嘢食，最有名其實係馬肉刺身。香港人以為別府拉麵好有名，就等於瑞士人係唔知咩叫瑞士雞翼一樣，去瑞士你係食唔到瑞士雞翼嘅。咁講係咪明晒？

2. 有種溫泉　叫巨型化糞池

別府市內好多溫泉，但全部都唔係大家心目中靚靚嘅露天溫泉，要露天溫泉，就入住貴貴嘅溫泉酒店入先有，大部份市內溫泉都好似下面張圖咁，似個巨型化糞池。

平時溫泉旁有花灑畀你沖涼之後入浴，再對唔治，呢度係無嘅，個個都係踎／坐響化糞池旁邊，用個盆撈糞水先洗澡沖身，之前去過一個叫浜脇溫泉嘅市內溫泉都係一樣模式。個款十足十大正時代個啲一鑊熟銭湯（澡堂）多過溫泉，不過銭湯係滾水，呢度係天然溫泉水。不過佢個樣令我有少少唔開胃，仲要個個溫泉都好熱，坐響入面10分鐘連你隻 ___（懶正經嘅女編輯話睇到不好意思，刪掉一隻字，自己估）都烚熟埋，我未試過浸溫泉浸15分鐘唔夠就閃人。（圖為區內非常有名的竹瓦溫泉，入浴只需100円，山區個啲靚靚溫泉就要過千円。）

3. 《別府之吻乜乜乜》是騙人的

細個見到好多咸片名都叫《別府之吻乜乜乜》，呢度係無嘅，呢個系列應該都係香港人獨創，點解叫《別府之吻》而唔係《廣島之吻》或《沖繩之吻》（嘩好浪漫）我就唔知了，但咸片戲院就有一間。相傳因為別府係日本著名溫泉區，有溫泉就有三溫暖，有三溫暖就有風俗娘，所以有間成人映画館配合其黃色事業發展，就好似汽車維修員有士巴拿一樣咁合理。

呢間叫南映嘅咸戲院，建於昭和20年（即戰後無耐，日本仔打完仗飽暖思獸慾好似係），距離而家已有差不多近百年歷史。我好震驚，日本人保肉真係做得好好，望住香港咸片戲院一間一間咁執（你叫唔識上網嘅大叔情何以堪），咸片戲院竟然可以生存近100年，係100年！（好，100年其實係吹大咗，但其實間小戲院都有成70歲，已經拎到長者卡架喇！）而家有部叫《巨乳未亡人》之類上畫，日日唔同，當然，同《別府之吻》係無啦「lung」嘅。

結語

大家以後去到別府就文明啲，唔好掛住搵地獄拉麵店同睇《別府之吻系列》嘅咸片啦。

【編按：本文為特約轉載，原文刊於作者Facebook專頁。】

（本文純屬作者意見，不代表香港01立場。）