個個都話結婚擺酒又煩又貴，仲不時聽到「因擺酒而分手」、「姊妹同新娘絕交」、「五百蚊人情事件」等等的故事，咁點解仲係咁多人選擇大排延席？一年有十次八次婚展，一樣係每次都迫滿人，大旺日酒席最低消費三十萬都一樣爭崩頭。人人都話純粹滿足長輩意願，唔通人人都孝感動天咩，說實話，打算擺／籌備緊的你，其實自己都enjoy的。

明明係件開心事，不過知道身邊好多人都對呢樣嘢反感，所以唔多唔少都拉咗長輩出嚟做擋箭牌，如果真係好唔想做一樣嘢，又點會咁易比人「迫」到吖（大家族，擺酒送層樓嗰啲例外）的確，擺酒都真係幾開心，除咗之前寫過嘅好處之外，仲有以下原因係令我覺得件事係值得做嘅。

回顧同重整朋友清單

根據政府統計處資料顯示，2016年男性和女性首次結婚的年齡中位數分別為31.4歲和29.4歲。三十而立，人生行到三十歲，應該儲落唔少酒肉朋友同真心知己，一場婚宴座位有限之餘，新人亦唔想「亂咁請」一啲唔熟嘅人嚟，得唔到真心祝福仲分分鐘比人怨，所以一邊諗請咩人嘅同時亦係一邊整理緊自己人生，回望吓唔同階段有咩「重要人物」出現過，而自己係好希望佢能夠嚟見證這人生重要一步。

而喺呢個定賓客名單嘅過程中，自然會諗返唔同階段嘅自己係點樣成長、同過咩朋友熟，而大家係幾時開始越來越少聯絡？以前呢個人點樣幫過你，大家點樣一齊唔交功課又或者係點樣一齊隊住杯麵、講住粗口OT……日忙夜忙嘅你，好地地係唔會諗返呢啲回憶的，藉著「擺酒」呢個借口去搵返一啲曾經好Friend但已失聯多時嘅朋友，係一件好事。

另一方面，當你真正開始搵賓客，逐個問嚟唔嚟到嘅時候，你亦會發現人同人之間嘅關係同你想像中有所出入，例如有啲人你以為同佢好Friend，以為佢一定好開心咁帶住祝福答出席，但一問，你發現你哋嘅關係並唔係你想像中咁Close，雖然佢無講出口，但對話中你知道佢唔想嚟。佢會話某啲Common Friend唔到，所以佢都唔想到；又會話婚宴好悶，從來唔出席任何婚宴；又或者係估計自己當日唔喺香港唔喺地球之類。

相反，一啲你覺得只係「熟過一陣」、「唔好意思唔請佢」、「即管問吓」嘅賓客，卻會有所驚喜，興奮到好似自己嫁女／娶新抱咁，熱情地問你婚禮搞成點呀？有無嘢要幫手？甚至主動提供好多有用資訊比你，到當日佢人到人情到，仲要精挑細選埋結婚禮物，同埋你喺佢眼神中真係睇得出佢係替你開心，而唔係有人用槍指住佢嚟。總而言之，你一邊請人，一邊感覺到有人認為：「點解我要夾錢比你結婚？」亦同時有人會話：「太好啦！我勁驚你唔請我！」人生行咗一段路，擺酒可以令你重新認清身邊每段友情。

對「金錢」有新觀念

網上間中就彈出一啲有關婚宴人情嘅輿論，慢慢就形成一股說法講到結婚擺酒係為咗賺人情咁。而我擺完酒之後真係覺得：「唔好諗多咗啦，你嗰一千幾百蚊對成場婚宴嚟講算得啲乜？」咁講可能會比人鬧，但剩係酒席都三十萬起，計埋攝影、禮服、大量利是、租車、婚照、花球乜乜乜……除非有父幹，否則大部份新人都預咗蝕，好少會睇重你封五百定一千，好記得有個朋友經濟環境唔係咁好，但佢好想出席我婚宴，我擺完酒拆人情嗰時，佢封利是入面除咗有人情之外，仲竟然有一張卡仔，喺度同我道歉，話自己無能力比得多，希望我唔好介意…….睇到真係感動到喊出嚟，朋友嚟見證已經好開心，乜鬼錢呀利是呀，呢啲過眼雲煙，大家唔使睇得張一千蚊無限大。

因為喺成個籌備過程中，每個項目都以「萬」為單位，初初好肉痛，但比多幾次錢就慣了，對五位數以下的金額無感覺。而組織一個家庭真係要使好多錢，供樓、裝修、傢俱電器樣樣都係錢錢錢，仲有第時仔女嘅奶粉尿片同學費呢？如果擺個酒幾十萬都割肉咁聲，第時仲點樣行落去？使錢都需要練習的。

（本文純屬作者意見，不代表香港01立場。）